Een klein betje vörs en natt’n schnèè

Het weer belöf vanalles, code rôôd en code gel en doar blif ’t biej. Een klein betje vörs en wat natt’n schnèè is alles waw we te verwacht’n hebt. Met die gedacht’n val ie in sloap. Lekker warm ôônder de stikdekk’n. Twei moand zit e wiej al in de winter. Code rôôd, pimpelpeers, oranje, nôôit van eheurt.

Alle daag’n vörs, schnèè en schnèèjach. Hèèl Nederlàànd lig à moanden ôônder ne dikke loage schnèè. De schaatstocht’n bint neet van de lôch. Lekker, nen èine schaats’n oaver de Schipbekke. Het is neet zôônder gevoar, mà de grôôte keerls woagt er zich an. En in Freeslàànd, de Elfsteed’ntocht. Biej de start achttien groad’n ôônder nulle. Vuur de allerèèrste kèèr konj’ det volgen op de tillevisie. Nôh ja volg’n. Of en tou ne flits en vôt wadd’n ze wier. In de männ’ntied leup het weerglas op noar vèèr groad’n vörs. Het weer wörd’n als mà slechter met geveulstemperatuur’n, nôôit van eheurt, veer ôônder nulle. Wiej’ konn’n der wà tèèng’n, lekker biej een bibberig beeldje en de warme kachel. Tied’n zat ie te kiek’n noar det beeldscharm, saam’n met den verslaggèèver, Arie Kleiweg. Niks ààns as schnèè, gen volk en ééne kaale massa, doar in Bartlehiem. Uutèindelijk in de veert’n, kwam der een eenzaam figuurtje an ríe. Ie zagg’n ’m ôônder de brugge duur scheet’n, iespèègels ôônder de kinne. As ne beginneling scheuive duur ôons beeld. Het argste môs nog kômm’n. Vieftig meter en vôt was e, ôônderweg noar Dokkem. Hij, Reinier Paping wörd’n de winnaar en was vuur altied ôônz’n grôôt’n Oaveriesselsen schaatsheld. Ne helletocht. Halverwèège wörd’n de schaatsers àmoa van ’t ies of ehaalt. Het wörd’n te geveuirlijk. Van de klèine tienduuz’nd diet er an begunn’n, haal’n der mà 126 de strèèpe in Leeuward’n. Van de vroole kwam der mar eene tut Bartlehiem, Annigje van Dijk-Bajema. Vuur eur, gen eeuwige roem en bloom’n. Den winter van drei en zestig blèèf an hoold’n tut begin meert. Vol verwachting kiek ie de wereld van vandaage in. Niks gen vörs en niks gen schnèè. Het weer blif gries, met zô of en touw een betje zunne. Loat ’t vuurjoar mà kômm’n.