Eindelijk röste, wiej wacht ‘t of.

Det magge wiej tenminste hopp’n want de leste wekk’n biw we an alle kàànt’n oaverrôômpeld duur pertieën diet àmoa geliek hebt, àj’ ze meugt gelèum’n. Woensdag, vieftien meert is de grôôte dag en één dinge is wis en waarachtig, ie zölt zeen det ze àmoa hebt ewunn’n. ‘N één’n iets minder as verwacht, ’n àànder had völle meer verlees verwacht en goat zô mà vedan.

In één geval heij’ het geluk um het resultaat met te könn’n vier’n biej Boode in Battum. De nieje pertieje BBB strik met ziene vazall’n doar neer um de zeegening’n te tell’n. Mà dan, hoe grötter die zeegening, hoe moeilijker of het geet word’n um de kèune in de benne te hoôld’n. Hoe grötter de tèèngslag, hoe moeilijker of het wördt um det àmoa rech te proat’n. Noa woensdag kan de vekiezingsproat de kaste in. Alle pertieën möt an de bak en loat’n zeen det ze het good vuur hebt met al die nieje of oavergeblèèm’n kiezers. De waan van ’n dag möt umme zet word’n in daad’n. De kiezers hebt altied geliek, de politiek möt er noa lustern en gen doldrieste dinge doon. Zie möt op ’n gegèèm’n ôôg’nblik wà duurtast’n, want zachte hèèlmèisters maakt stink’nde wôônd’n. Wiej goat het metmaak’n. Aj’ woensdag nog neet hen stemm’n bint ewes, nemt dan asnog die meuite, zodàj’ in ieder geval met könt proat’n en oe vuur de kômmende vèèr joar vertèègenwoordigt veult in de Provincie, het Waterschap en de Èèrste Kamer. Dôônderdag is ’t te laate. Wordt de plann’n biej eschaafd, wordt de Groningers ruumhartig ehölp’n, könt de toeslagoolders met een gerös harte goan sloap’n, wordt de boer’n e hölp’n um te oaverlèèm’n, klinkt de stemme van ’t Plattelàànd nog harder duur in Den Haag, kan de klimaatstorm en de stikstof eindelijk wier röstig goan ligg’n? Blif het kabinet zitt’n, fietst Rutte vuur de leste kèèr as premier oaver het Binn’nhof? Vuurlôôpig zit e der nog en met ‘m, dit kabinet. Woensdagoamd um nèèng uur wèèt wiej meer en köwwe àmoal ôônze verkiezinguutslag vier’n met ne borrel of een bittertje. Hoe het ôk geet, wiej hebt àmoa de mèugelijkhèid ehad um te stemm’n, noe is de politiek wier an ‘t woord. Eindelijk röste, wiej wacht ’t of.