Eredivisie

Schakelend langs de veelden. Allemachtig wat spannend. Wie zagen een ploeterend Go Ahead en een verzoepend De Graafschap. Letterlijk en figuurlijk gungen ze kopje onder toen Deaventer, met een wonderlijke kopballe, op veursprong kwam. Links en rechts zag ie al stoom uut de huuze kommen.

In Doetinchem kwam inmiddels het water uut de putten noar boaven. Het veeld stund compleet blank. De wedstried worden stille gelegd want ie konnen der alleene nog maar waterpolo spöllen. Met man en macht mossen ze an het an het wark um het veeld weer dreuge te kriegen. In Rotterdam heulden de Deaventersen de veursprong vaste en toen was het een uur lang billen kniepen. In Doetinchem konnen ze eindelijk weer beginnen en toen mos de rust nog kommen. Det lukken nog wel, maar fatsoenlijk ballen was ter niet meer bie. Noa de rust lange halen noar veuren en maar hoppen det de balle een keer good viel. Helmond deed zien sportieve plicht. Het bleef spannend veural op het veeld bie Excelsior. Noa het leste fluitsignaal zakten de spöllers van De Graafschap as ne plumppudding in mekaare. Het was weer neet gelukt, maar neet opgeven, het kan nog. Mood verleuirne , alles verleuirne. Op het veeld bie Excelsior leupen de overwinnaars in de polonaise. Go Ahead weer in de Eredivisie. Deaventer kleurden rood en gel en ook in Battum kwam der op sommige plaatsen rood gelle rook uut de schoorsteen. Volgend joar weer de IJsselderby, Stokvissen tegen Blauwvingers en wat denk ie van de strijd tussen Salland en de Tukkers. Loaw we der met zien allen van genieten. Moedigt oen eigen ploegje an met respekt veur de tegenpartij. Loat wie noe eerlijke weazen, zonder tegenstanders valt er weinig te genieten. Volgend seizoen weer stadions vol volk.
’s Middags noar ons eigen ABS of Go Ahead en ‘s avonds met het bord op schoot, genieten van de strijd op de greune veelden. Deaventer gefilsteert met de promotie, dat wie maar lange van oele meugt genieten in de Eredivisie.