Fees in Lôô

Zie bint er à moand’n met gangs en det is gen wôônder. Dit joar vuur de honderdste kèèr, “Het Lôôfeest”.Ie zit oen een betje vuur de geest te haal’n, hoe of det ewes is vuur honderd joar trugge. De eene helfte zit biej Tante Heintje en de ààndere helfte biej Bôlink. Tante Heintje, möj’ oe vuurstell’n, doar was nog dààns’n biej eur in de gelagkamer.

Netuurlijk, ôk volle bak biej Bôlink. Ne tèènte was ter toen nog neet. Ne drèèjmölle, met een peerd det rôônd leup, vuur de wichter en ne kroam met etterieje vuur de ôôld’n. Möj’ oe vuurstell’n, de vroole àmoa met knipmuss’n en de keerls in ne zwarte klepbokse op klôômp’n. De tied’n bint veràànderd. Noe, honderd joar later, is alles völle kluuriger. Het wördt grôôts an e pakt. Zie begint al op dôônderdag met ne reünie. Alles wat in Lôô wönt of ôôit hef e wont, heurt doar biej. Het zal een wierzeen weer van ôôle en nieje bekèènd’n. Zelfs de börgemèister van Dèimter kump, um het honderd joarige jubileum of te trapp’n. Het vôgelscheet’n steet op de dôônderdagoamd al op ‘t programma. Hebt ze ’n hèèl’n oamd de tied um det arme dèèr noar beneed’n te haal’n. Vriejdagoamd stroomt de tèènte vol vuur de joarlijkse revue. Köw we zeen wat vukke frats’n of de Lôôse kachelpiep’n wier uut hebt ehaalt. Ie möt er biej weer want noa de revue kump ter vèurwark. De lôch zal alle kluur’n van de rèèng’nboage hemm’n en het geknap zal tut in Battem en Loar’n te heur’n wèèr. Zoaterdag, ne drôkk’n dag met de optoch en de zeskamp.’S oamds geet de jeugd uut ’t dak met “Stoal met glèèze”. Zundag nemt de euldern het oaver met de joarlijkse brunch en ’s middag goat de jong’n wier vedan met “The 100% Powerband”. Ech àj’ wilt geniet’n màj’ zanger Zwarte Jannes neet oaversloan. Kortumme een machtig programma vuur honderd joar fees in Lôô-Battem. Ie sloat er het gelikte feesbook mar is op noa en ie zölt zeen det er vuur iedereene wà wat môôis tuss’nzit. Èèm’n weg van de kökk’n en ôôlderwets preum’n van het honderste Lôôfeest.