Fietsvirus

Ieder joar zô mill’n juni, begin juli, stekt det virus de kop op. Netuurlijk ie volgt de wielrenners à vanof het begin van ’t joar. Bint er nieje sprinters, of kan der in één kèèr ééne onmeunig good klimm’n. As kind binj’ der à met besmet. In die joar’n höng’n de kraànt’nknipsels netjes op de riege op eplakt in de sloapkamer. Noa een en twintig etappes was ter gen behang meer oaver. Het was één en al kràànt’npepier. Wiej organisèèrd’n zelf ôk een rondje en àmoa wow we Wim van Est of Wout Wagtmans wèèr. Ôôit rèè we met in de plaatselijke ronde. Gewoon op oene eeg’n fietse. Wiej start’n in Battum biej Us Wenthe. Met ne koppel van zô’n viem’ndartig man gung ’t richting de finish. Met völle lawaai trök ie duur de scharpe buchte in Lôô. Het pilleton blèèf biej mekaa, mà net in ne flauw’n boch noar rechts, stök ter ne boer oaver. Bang, het halve pilleton klapp’n der oaver hen. Weg klassement, noe was det vuur miej neet arg, mar vuur euldere jongs was ’t baal’n. Gelukkig leup ’t veerder àmoa good of. Veer op achterstàànd kwam e wiej an de finish. De lieskes bint in evult en noe mà kiek’n wat ‘t wördt. In de echte tour geet het ôk neet altied good. Twei favoriet’n vuur de èèrste tiene lèèr’n noa één’n dag al op ‘t asfalt. Gebrökk’n slöttelbeen en kneischieve. Zô zeej’ mà, ie könt er nog zo völle verstàànd van hemm’n, het blif een gokspölleke. Mà wal een spölleke um te bliem’n volg’n. Àj’ neet van ’t fiets’n hôôlt, köj’ altied nog geniet’n van de môôie plaatjes diet de tillevisie schöt. Het virus is nôôit wier weg egoane en de verrassing’n bint van alle daag’n. De held’n van vrogger blieft op oen netvlies en ieder joar kômt er môôie verhaal’n biej. Wie kump ter as klassementleider as èèrste an in Parijs. Hindley, Pogacar of toch Vingegaard. Parijs is nog veer, mà oaver dikke tweiduuz’nd kilometer en dartig valpertiën wèè we meer. Völle wille met ‘t kiek’n noar de renners en de onmeunige môôie veergezicht’n. En det fietsvirus, det zakt vanzelf wier of.