Fijne Karsdaage en een gelukkig Niejjoar

Astebleef doot vuurzichtig an. Een keerltje zwoar gewôônd en noe à ne vèurwarkdôôi’n. Hoe völle waarschouwing’n möw we nog hebb’n? Van disse kàànte in ieder geval, ’n lest’n dit joar. Wiej goat er èèm’n tuss’nuut, net as zô völle mèèns’n.

Het daaglijkse lèèm’n kump tut stilstàànd. Èèm’n geniet’n van de kômmende femiliedaag’n. Karsoamd, de Karsdaag’n en dan op noar Ôôlejoarsoamd. Met mekaa, met femilie, in stilte trugge kiek’n op wat is ewes. Geboortes van nieje wereldbörgers, mar ôk het verlees van dierbaare neuist’n. Zörgt er vuur det er gen mèènse allèène is. Pakt mekaa biej de hàànd. Prebèèrt um met ne glimlach het nieje joar te verwelkômm’n. Netuurlijk met alle goeie wèèns’n, ne borrel en öllieboll’n. Netuurlijk met alle vertrouw’n in de politiek en boavenal, Vrèè in de hèèle wereld. Wiej wèènst ’t mekaa touw van het Kremlin tut an het Witte Huus en veerder noar het Plein van de Hemelse vrede. Wat zôl het môôi wèèr as ter ôk mar iets van uut zal kômm’n. Het Nieje joar, wat zal ’t gèèm’n? Noe heij’ nog krap twei wekke um der oaver noa te dèènk’n, ôônder ’n Karsbôôm, biej de warme kachel. Veer weg van al het geweeld, op een paar uur vleeg’n van hier. Veer weg van al die naarighèid. Suldoat’n kroepend duur de vreeskeulte in de lôôpgraam’n. Doaran dèènkend nem ie alles op de kôôp touw. An de ààndere kàànte is ’t ôk zô, dàj’ ’n armood van de hèèle wereld neet op de schoolders könt nemm’n. Nee, geniet van de kômmende daag’n. Wàj’ ôk doot, lekker op vakjààntie, pannekooke met worst. Lekker uut hen ett’n. Noa vaa en moo, èèm’n het hèèle lèèm’n duurnemm’n. Het maakt neet uut, geniet er van, want vuur dàj’ der arg in hebt bint die speciale daag’n, van Mirrewinter tut en met Niejjoarsdag vuurbiej en nèimp het harde lèèm’n wier zien’n gewoon’n gàànk. De èèrste vörsperiode lig achter ôôns, mà de winter is nog lange neet vuurbiej. Zeukt met mekaa de warmte van disse bezundere daag’n. Zeukt met mekaa het geluk. Met mekaa biej starker. Àmoa hèèle fijne Karsdaag’n, blieft vuurzichtig. Vuur iedereene een zalig uutèine en een good begin van tweiduuzend drei en twintig.