Geliekspel

Hèèl netjes zit ie um half tweie kloar. Het vlaggeschip van Battum möt spöll’n tèèg’n de eeuwige rivaal’n uut Hoolt’n. Een lekker zunneke begeleidt ôôns noar de voot van den Hoolterbarg. Völle Battumse supporters hebt de weg noar Hoolten evund’n.

At de bèire ploeg’n het veeld opkomt brek ter een onmeunig vèurwark lös. Het lik wal ôj’ an de Vetkààmpstroate bint. Det belöf wat vuur de wedstried. Nôh det heiw we wal is better ezeene. Het is as of de beire ploeg’n stief stoat van de zenuw’n. Van reedelijk spel is gen sproake. In de rust wordt de kleedkamers op ezocht met de brilstàànd op ‘t bord. De èèrste supporters hebt ’t dan al bekekk’n en zeukt de warme kachel op. Zie zölt neet völle miss’n. De thuusploog blif de kààns’n um zèèpe help’n en ôk de ôônz’n wèèt gen gèètje te vind’n in het rôôd zwarte bastion. Nul, nul. Jammer want zie hebt de punt’n zô hard nèurig. Één puntje geet er met noar Battum. Gelukkig wordt ze op de ààndere veeld’n ehölp’n en klimt ze toch nog iets op de ranglieste. Det zal ôk nèurig wèèr, want de degradatierèègels leegt er neet umme dit joar. Wiej hôôlt er alle vertrouw’n in. Vertrouw’n, woer drieft de gedacht’n noe wier hen. Netuurlijk, de politiek. Nog ééne wekke, dan magge wiej de gàànk noar de stembusse maak’n. Doot oe zelf een plezèèr en brengt oen stemme uut, dan màj vuur de kômmende vèèr joar wier met kuiern in de Provincie en de Èèrste Kamer. Zôl der völle verààndern? Ie zeet neet völle verschil, àj’ op de grôôte verkiezingsbord’n kiekt. Allèène àj’ oaver het Plattelàànd goat, lik het er op det ze doar wakker bint ewörd’n. Hebt ze in Den Haag sloapende hôônne wakker emaakt? Wiej goat ’t metmaak’n. Kriew we ne nieje koers, kan de vlagge àànsumme, of blif alles biej het ôôle? Wat het ôk wördt, één dinge steet vaste, het ôôle gezegde, blaffende hôônne biet neet, dut nog altied opgeeld. Loat oe stemme heur’n, het mag nog altied in ôôns môôie làànd.