Gerlien bedàànkt

De karms’n rolt as lekkere gebakjes van de bàànd. Alle wekke is ’t wal argens raak. Ofgelôôp’n wekke was Lôô an de buurte. De tèènte stun der à ne wekke van te vuur’n en vriejdagoamd stroom’n e vol vuur de revue. As vanôôlds kwamm’n de stukskes, àmoal in het tèèk’n van rock en roll, vlot vuur het vootlech. De zaal genöt.

An het èine wörd’n Gerlien bedàànkt vuur al die joar’n inzet vuur het Lôôse feest. In eur ofschèid wörd’n alle vriejwilligers duur de stààmpvolle zaal bedàànkt, met een anhôôldn’d applaus vuur al det wark, det er ieder joar mà wier wördt edoane, um alles op de rails te krieg’n. Zoaterdagmänn’n stun de kruussing in Lôô al wier vol van ’t volk vuur de optoch. Het zunneke wark’n volop met en noa het Loolied en het Wilhelmus begun Orpheus an de drei rondjes um de feeswèire. Alles volgens de traditie van noe al 98 joar. Noa oflôôp, amoa met mekaa de tèènte in vuur ne kômme koffie of ne verfrissing. De jeugd hef ’t vuur mekaa. Duur omstandigheed’n, jammer genog, gen botsauto’s, mà wà het hèèle weekend vuur niks in de zweefmölle. Zundagmänn’n volle bak vuur de gezamelijke moaltied. De vriejwilligers stoat à wier kloar um al die hongerige môônd’n te vuurzeen van gebakk’n eier tut an spek touw. Grôôte klasse en det ôônder de passende muziek van twei rockende dèèrntjes. Doarnoa verplaatst het hèèle circus zich noar de scheetwèire. Vol spanning wördt er uut e kekk’n noar de nieje schuttershôôgheed’n. De femilie Nijland is ne prinsesse rieker en in de femilie Holmer is de prins gepromoveerd tut koning. Het fees kan beginn’n as de koning en de prinsesse op de schoolders de tèènte binn’nkômt. Hèèl Lôô is getuuge van disse warme karms’ndaage, woer biej het water in het springkuss’n, al of neet gedwung’n, verkoeling gif. Met zunne hette möj’ der vuur zörg’n dàj’ van binn’n en van buut’n nat blieft. Het Sallààndlied galmt duur de tèènte. Dan zo hèinig an, tèèg’n melk’nstied wördt het wier stille in Lôô, woer het lèaven vedan geet in röste en vrèè.