Goat oen gàànk

Onvuurstelbaar, wat er de ofgelôôp’n wekke àmoa gebuur’n. Ie zit argelôôs noar de tillevisie te kiek’n. Ie wrieft oe de ôôg’n uut. Wat is dit? Twei volwass’n keerls, diet doar hun gast zit of te mest’n, vuur ’t ôôge van de hèèle wereld. Ongelèuflijk, mà woar. Het blif oe vuur altied op ‘t het netvlies plakk’n.

Horkerighèid van de boamste plàànke en det möt dan de vrèè breng’n!? Het lik ter neet arg op. Wiej bint nog mar een paar moand ôônderweg met disse Amerikaanse regering en ie vroagt oe vertwiefeld of, woer det op an geet. Ôôndertuss’n drèèit de wereld vedan. Alle daag’n honderden en honderden dôôi’n in Oekraïne, ongewishèid in Gaza en Carnaval van Limburg tut Battem. De mèèns’n maakt er een compleet gekk’nhuus van. Gelukkig bint er ôk nog môôie dinge. Het Rôôd Gelle vlaggeschip van Dèimter trök gespann’n noar Eindhoov’n um doar te loat’n zeen hoe ze môss’n voetball’n en zie slaag’n met vlag en wimpel. Het ongelèufelijke gebuur’n. Het grôôte geeld krèèg op de nött’n en het carnaval barst’n lös. Tut in Dèimter was ’t vèurwark neet van de lôch. Dikke wille en het mèuiste môs toen nog kômm’n. Iedereene dèènk’n det de lechstad zien lesje wal had elèèrt, mà nee, zoaterdag, in de competitie, dèud’n de Rôôd-Gell’n het in de Adelaarshorst nog is dunnetjes oaver. De schàànne was vuur PSV hoaste nog grötter as, wat er in het vèère Amerika gebuurd was. Wiej zölt ’t nôôit vergett’n. Ôôndertuss’n bint de wakker geschrökk’n Uuropiaan’n an ’t vergaadern ewes in Londen. Zôl det dan ’t begin wèèr van een betje röste en een èine an al det bloodvergeet’n? Wiej wacht het of. Hé, een telefoontje uut Eindhoov’n. Hèèl netjes vroagt ze, of ze nog wat zegg’n meugt. Geintje! Zô zôl het in Amerika ôk mönn’n goan, mà ja. De Amerikaan’n hebt ekèuz’n. Wiej zölt ’t er met mönn’n doon. Met al die gekkighèid en tariev’n wördt doar ôk alles duurder. As det vèèr joar good geet, geet er meer good. En natuurlijk meugt ze in Eindhoven nog wat zegg’n. Goat oen gàànk, GO AHEAD.