Plan De Brink
Klik hier om de 3D animatie te bekijken

Good goan en komt zo of en touw nog is eaven kieken

Börgemeister Heidema hef ofscheid enömmen. Heel völle van ons hebt hem de hand eschud. De meesten van ons hebt het geleazen en bint veerder egoan met het dagelijkse leaven. Zo geet det. Wie hebt inmiddels ne tiedelijken burgervader en noa de vakantie zal der wal een keer ne niejen worden angesteld.Commisaris Heidema zöl e wie zo af en touw nog wal eens op de tillevisie zeen met ne grote ketten umme. Hij zal het ongetwiefeld good doon, det hef e wal bewezen in de afgelopen elf joar. Alaaf en bedankt vuur alles. Gelukkig blif hij met zien gezin in de buurte wonnen. Het zôl mooi weazen at e zich zo noe en dan nog is löt zeen en dan netuurlijk zonder de ketten umme. Bievuurbeeld in Lettele op het feest of op moandag bie de Battumse karmse. Gewoon, hier en doar, lekker eaven bieproaten, onder het genot van een drankje. Het vuurjoar is ondertussen geruisloos oaver egoane in de zommer en de temperaturen bint noe al een wekke of zesse boaven de vief en twintig groaden. Volgens mie is het nog nooit zo lange, zo warm en dreuge ewes. Zelfs de sleute langs de weg valt dreuge. Het minste of geringste kan ne groten brand veroorzaken. Loat wie der met mekaar op vervat weazen en veural vuurzichtig an doon met de barbequie en andere open veurkes. Veerder vuur de rest, veural genieten van die heerlijke temperaturen. De buurman, ie weet het wel, dent drei moand onderweg is, zit noe te puffen in zien campertje met 46 groaden. Wie zölt hem de kommende wekke is good in de gaten holden. Hij zit an de thee, dan zit ie toch leever onder ne treurwilg te genieten van een kold biertje. Drinkt er dan allemoale eene op het succes van Heidema, dat het hem good mag goan en dat e zo of en tou nog es kump kieken.