Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Grös meijen

De eerste zunnestroalen verwarmt het grös. Ie zeet het greuien, toch nog mar eaven wachten, de volgende bujje kump ter al weer an. Hoe lange is het eleene det de weidens körkdreuge waren. Het grös lag as heui in de weilanden. Het zag ter allemoale treusteloos uut. De experts meldden det het nooit weer op peil zol kommen. De hele nacht regent het deur, maar dan, de andere morgen, mooi weer en een lekker temperatuurtje.’s Middags mot het dan toch maar gebeuren. De grösmachiene van stal en vuurzichtig beginne wie an de eerste sprietjes. Oh, doar steet toch nog wal een betje water. Gewoon net as anders, der umme hen meejen. Te laate, de wielen dreeit rond en de mechiene steet stille. Vuur de allereerste keer in dikke dartig joar, hatstekke vaste. Het is nog nooit zo nat gewest, zeg ook de buurman, een dag later. As ik det had geweten?! Met de goeie schoone an, tut an de enkels in de drek. De commentaren komt van alle kanten, maar het leed is geschied. Gelukkig heb ie buren diet oe wilt helpen. Opgelost, de mechiene steet weer op stal, veurlopig gen grös meijen. Wat mot ie dan toch doon? Ie kunt bienoa nargens meer hen. De corona geet as een gek oaver de wereld. Scholen wal of neet dichte. Vliegtuugen blieft an de grond. De snelheid trugge noar honderd kilometer. De heele wereld kump stille te liggen. Stikstofprobleem op elöst? Honderd doden doar en tien doden hier, geen paniek, niet hamsteren en bie huus blieven. Hoe völle mensen bint er inmiddels al weer genezen? Hoe völle mensen bint er deur andere ziektes en honger van ons hen egoane? Moet ie bezörgd weazen bie ieder mense diet ie tegen komt? Het bint allemoale vroagen en de verwarring wordt als maar grötter, deur de moatregelen diet van dag tut dag weer anders bint. Het is moeilijk en doarumme moet wie met zien allen maar achter onze leiders en specialisten blieven stoan. Loat wie der maar een coronaatje op drinken.