Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Het was röstig in Battum

Iedereene bleef thuus, behalve de vaderlandse pers. Zie kwammen met groot materiaal, um te kieken of ter nog oaverlevenden waren. Gelukkig völ det nog wal met. Battem hef het goeie veurbeeld gegeven en noe dut heel Nederland ons nao. Nuchter boerenverstand, zôl doar dan toch gebrek an weazen in Den Haag? As det zo is kump de oplossing volgend veurjoar met de verkiezingen. Onzen wethoolder, Erik Stegink, geet in de landelijke politiek veur ne nieje partieje, Boeren Burger Beweging.

Hij steet deirdes op de lieste. Zeet ie het al veur oe, ons “Boertje uut Battem” zal ze doar is eaven vertellen hoe of het möt. Het is jammer det e stopt in Deaventer, maar wie blieft hem volgen, doar in het verre Den Haag. Natuurlijk goat ze het halen, het platteland schreeuwt um andach. Het nuchtere boerenverstand hef Deaventer gen windeier gelegd. Dank oe de Koekoek, zie stoat er better veur dan ooit.
Vandaage eaven met de mondkappe op noar Battum. Nog gen vieftig meter veerder stoaj’ in de file. Veur mie dreeit ne groten stoacaravan de bos in. Wat zullen wie noe kriegen, ne nieje camping, noet de mensen neet meer noar het buutenland kunt? Het zal toch neet? Met gemengde geveulens, lichtelijk benauwd, ried ie op Battem an. Blood prikken, niks te betekenen, zô loop ie de praktijk binnen. Weer in de file. Veur mie steet een eulderen man vertwiefeld um zich hen te kieken. Gen mondkappe, ie blieft er netjes anderhalve meter of. Maar toch, eaven later goaj’ der langs um de hande te wassen. Helemoal alleene zit ie in de wachtkamer. Het groote veurdeel van ne ofspraak maken. Één keer prikken en het is gebeurd, grote klasse. Vief minuten later loop ie noar buuten. De euldere meneer hef ondertussen zien mondkapje op. Nog eaven wat voer halen veur de geitjes. Det is snel gebeurd. Kon het zo zelf pakken. Det vreur mien op den emmer. Twee grote zakken brokken. Noa de eerste zak was de brille al compleet besloane en noar de tweede zak, zag ie gen zak meer. Snel de auto in, of die kappe. Gelukkig kloarden het snel op en waren der onderweg gen files meer.