Het Zwarte Schoap

Ie hooft neet alles te zeggen

Verkiezingen, hoe zol het goan? Negen uur de eerste veurspelling. De VVD met 36 zetels en D66 met 28 zetels, glorieus an kop. De hele oavond hebt ze op de tillevisie zitten klasjeneren oaver disse ciefers. Een klein uur later worden het een betje biegesteld en ’s nachts om half twee was ter hoegenaamd nog gin uutslag binnen.

D66 stund te dansen op de toafel. Met veerkante ogen van het kieken zochten wie,zonder uutslag, het bedde op. Met die eene zetel veur Bij 1 en die van de BBB, kwam de sloap oaver mie. Ik reed oaver de A1 richting Den Haag, langs windmolens en eindeloze betonblokken van bedrieven, op weg noar mien nieje baane. Oaveral is het landschap an het verloederen. Doar was gen tied um lange bie stille te stoan. Zie wachten op mie, as nieje ondersteuner van de fractie. Hoe zol det goan? Vuur hondervieftig man koffie. Zol det de hele tied zo blieven. Ik warkten mie dree slagen in rondte. Gen mense stök ne vinger uut. Wat een ge-emmer. Achterof waren der een man of wat diet alleene maar greune thee drunken. Het was gen doon en van schrik worden ik wakker.
De andere dag was ter nog altied winst veur onzen tapdanser, alleene waren der uuteindelijk 23 zetels oaver. De jongens van Volt en Ja 21, bint natuurlijk verrassende nieje sterren an het firmament. Knap gedoane allemoal.
De warkelijkheid zal veur onzen Erik Stegink der heel anders uutzeen. Hij zal met ziene nieje collega’s die ene zetel in de kamer moeten verzilveren. Det is in die slangenkoele van Den Haag zwoar wark. Alles wat ie zegt moet ie op een goldschaaltje ofwegen. Het minste of geringste wordt tegen oe gebruukt. Doarumme, blieft bie oen eigen verhaal. Wie wenst oe vanuut het Sallandse, van al die burgers en boeren, alle succes. Hoolt altied de olde boerenwiesheid veur ogen, sprekken is zilver, ma zwiegen is gold. Wat dus wil zeggen, alleene oe stemme loaten heuren as het neudig is. Wie blieft oe volgen.