Plan De Brink
Klik hier om de 3D animatie te bekijken

Het Zwarte Schoap

De melk kokt oaver

Völle mensen denkt det melk in de febriek wordt gemaakt. Det lig toch eaven wat anders. Wie kregen as kinder regelmoatig de vroage, van haalt eaven ne kanne melk bie opoe. Zo vars van de koe, uut de melkbusse in de kanne. Heel veurzichtig leup ie trugge um maar niks te slateren. De kanne op het gaspitje of op de kachel, as ten branden. Het mos eerst kokken veurdet er van kon worden gedrunken. Doar gung het wal is mis.

Het witte goedje leup oaver de kachel en branden er zich stinkend an vaste. De rotzooi en de locht diet det gaf was speciaal. De schreeuw, “De melk kokt oaver “ was een bekend fenomeen in die tied. Wie schreeuwden het de vrouwen ook wal is noa, at ze met een iets te groten rand van de onderjurk deur het darp hen fietsten. Nee, netjes was het niet, maar het gebeurden gewoon. Noe zol det niet meer kunnen, gewoon um het feit dat ie hoegenaamd gen deerntjes meer ziet in rokjes. Ie zollen hooguut kunnen schreeuwen van ie hebt de spiekerbokse kapot, maar ja, det is normaal. Met de schreeuw, de melk kokt oaver, kreeg ie iedereene in de beene, umdet ie wussen wat veur een troep of die vastgebrande melk gaf. Gelukkig gung het meestal good, maar dan begun de ellende pas echt. Det groote dikke vel, det zich had gevormd op de melk. Oppassen. Veural as ie koffie drunken met melk en suuker. Heel veurzichtig worden de melk bie de koffie gegötten, maar zo of en touw kwam der een stuk vel met. Met een plons belandden het in oen köpke en doar zat ie dan. Ie mossen, wal hoaste verplicht, det vel noar binnen warken. Ie hadden nog geluk det niet het hele vel in oen köpke lag en de koffie op het schötteltje. Gelukkig ook allemoal verleden tied. Ie pakt noe het fleske koffiemelk en ie kunt genieten van oe wal verdeende köpke koffie. Denkt er umme, de melk kump nog altied van de koe.