Hij stopt er met

Het zat er an te kômm’n, mà toch kwam ’t nog onverwachs. President Biden trek zich trugge uut de race um ‘t presidentsschap. Het is te hopp’n det Amerika noe ôk wakker wördt en zich as een blok achter de nieje kandidaat stelt, mà det is nog mà wier ofwacht’n. Wat is det toch, det ze zô weg lôôpt met Trump?

Hebbe wiej der dan hèèmoa gen kiek op, of zit Amerika toch ààns in mekaa, as daw we arg in hebt? Wie goat ’t met maak’n, de kômmende moand’n, mar èèrs trekke wiej ôôns zelf ôk ne wekke of wat trugge. Ja, ôk wiej kômt er neet ôônderuut. Vakààntie, gelukkig het kan nog. Èèm’n de narighèid achter oe loat’n, de zörg’n van alle dag in de kaste legg’n. Massaal het vliegtuug in of armood lied’n in ne te krappe tèènte of caravan. Het mag amoa. Netuurlijk köj’ ôk lekker biej huus bliem’n, zörg’n dàj’ de koeling good vol hebt en geniet’n van Parijs. Hoe zô Parijs? Misschien heij’t nog neet in de gaat’n, mà de wielrenners van de toer de France bint estopt in Nice en vleegt noe as de wiedeweerga noar de Fràànse hoofdstad um uut te maak’n. wiet er Olympisch kampioen wördt. De Olympische Speel’n, het grötste sportspektakel van de wereld, steet vuur de duure. Neet allèène wielrenn’n, mar in twei en dartig sport’n zölt de atleet’n mekaa bevecht’n um ’t goold, zilver en brôôns. Sport’n diej’ ààns nôôit könt zeen, zölt op de tillevisie an ôôns vuurbiejtrekk’n. Reputaties zölt snèuveln en nieje sportheld’n wordt geboor’n. Dus ondàànks dàj’ het plat leèz’n èèm’n möt miss’n, is ter toch nog genog te belèèm’n. Geniet er van, want vuur dàj’ der arg in hebt zit ie wier in het dwangbuis van de dagelijkse warkelijkhèid. De narighèid van ne droon op Tel Aviv en en de haven van de Hoethies an bölle eschött’n. Te völle um te beneum’n. Doarumme, weg met de zörg’n en een ieder, op zien eeg’n menèère, fijne vakààntie en dan zee we eind augustus wà wier an. Blieft gezôônd en tut dan.