Hoe köj’ det noe vergett’n?

Nee, natuurlijk neet, Mooderdag verget ie neet. Of toch in disse jachterige tied’n? Het kan oe oaverkômm’n en doarumme à vaste ne goeie road um 18 juni in de agenda te zett’n. Woerumme? Àk ‘t neet dache, Vaderdag natuurlijk. Mooderdag vergett’n, gen nôôd, èigelijk is ‘t alle daag’n Mooderdag. Alle daag’n stun de stoete vuur oe kloar en zörgd’n zie der het mèèste vuur, det de kleere kloar lagg’n en oe berre wörd’n op emaakt, vuur zô veer àj’ det zelf nog neet kônn’n. Mooderdag, ie zagg’n de keerls met ne bôs bloom’n op huus an fiets’n. Jonge lèu met ne môôi’n bloom’nbak, um mooders is extra in ’t zunneke te zett’n. Èèm’n op visite, Mooder zörgt vuur de drankjes en de lekkere hapjes. Hatstekke gezellig, mà hôôlt wal in de gaat’n det ze det alle wekke dut, zo vaake àj’ op visite bint. Zelfs op Vaderdag is ’t vaake mooder, diet de femilie verzörgd. Het is achter de rugge, de bloom’n stoat in de vaaze en de vaste plàànt’n stoat te prôônk’n vuur ’t huus. Biej de bloom’nwinkels is ’t èèm’n kaal in de schapp’n. Met Vaderdag komt er wèinig bloom’n op toafel. Nee, noe bint ààndern an de buurte. Vaa kan zich wier opmaak’n vuur ne liter genèèver of een betje roekewark. In het argste geval krig e een paar nieje ôônderbokses, umdet ze net in de uutverkôôp wadd’n. Het maakt neet uut, doar wörd’n altied hard um e lach’n. Vaa blèèf ter kalm ôônder. Mar alle gekhèid op ’n stökske, het belangriekste is, dàj’ de ôôle lèu in eere hôôlt. Goat er doarbiej vanuut det het alle daag’n, Mooder- en Vaderdag is. Ie stoat er neet alle daag’n biej stille, mar ie markt of zölt ôôit mark’n, det het gemis pas veulbaar is, àj’ den bos bloom’n of den liter genèèver neet meer hooft te breng’n. Mooderdag vergett’n, gen nôôd, det kan nog alle daag’n en Vaderdag, zet ’t in de agenda.