Plan De Brink
Klik hier om de 3D animatie te bekijken

Ie bint er maar drok met

Lichtelijk onder druk, maar in het besef dat het dan toch maar mos gebuuren, gung e wie richting Battum. Nog nooit eerder hadden wie een griepprik gehaald bie de dokter, maar noe, in disse coronatied, vunden de kinder het toch wal heel belangriek. ’S morgens eerst al eaven deftig vier keer in de ontlasting geprikt, veur een darmonderzeuk en det bie tante Post deur breevenbusse gemikt. Doarnoa, in èèn doon, noar de praktijk um de griepprik en de pneumakokken op te halen. Gelukkig konnen wie de auto nog makkelijk kwiet worden.

De mondkappe op, ie veulden oe net ne bankrover. Hoe dichterbie of wie kwammen hoe meer bankrovers of ter rond leupen. Vanuut de veerten stun der al ééne te zwaaien um te beduuden dat wie doar noar binnen mossen lopen. Het was makkelijk. Ie loopt maar achter de anderen an. Met veer, vief hoarspeldbuchte kwammen wie bie het anmeldingspunt en konnen geliek vedan achter noar het gebouw. Eenmoal binnen, sleug mien de schrik um het harte. Griepprik rechtdeur en pneumakokken rechtsof. Het gaf mie een “unheimisch” geveul. Gelukkig völ het allemoale met. Een alleraardigst deerntje gaf tekst en uutleg. Ie moggen zelfs nog kiezen, an wat vunne kante of ie de zwoarste spuite wollen hebben en veur dat ie der arg in hadden, was het gebeurd. Nog eaven zeuken in den doolhof en ie stunden weer buuten. De mensen diet nog an de reize mossen beginnen, kon ie geruste stellen en zeggen dat het allemoale wel metvöl. Snel noar de auto en die benauwde kappe of. Corona, wanneer zôl doar een vaccin veur weazen? Al die besmettingen rond umme oen hen, ie wordt er bange van. Eerst maar ofwachten of e wie gen zeeren arm of griepverschijnselen kriegt en hoppen op een good bericht van tante Post. Noe op huus an en hoppen op bettere tieden.