Plan De Brink
Klik hier om de 3D animatie te bekijken

Ie komt neet an mien komkummerke

Ôj’ noe wilt of neet, ie könt er neet meer umme hen. Oaver good twei wekke barst het carnaval uut zien voog’n. Neet allèène ôônder de grôôte rivier’n, ôk de Battemse Pôômpers bint kloarwakker. Inmiddels hef de nieje Prins ne naam, Prins Tieske.

De jonge lèu wèèt dan genog, mà de euldern haalt de schoolders op. Neet terechte, want diss’n Prins is van alle markt’n thuus. Toevallig lôôp ie ‘m tèèg’n de hoed an, op een feesje biej de buur’n. De Battemse Pôômpers op tournee. Èèm’n warmdrèèi’n. Netjes gèèf ie ze de hàànd um dan, op gepast’n ofstàànd, te geniet’n van ne môôi’n oamd. Mill’n op ‘t feest möch ie verzeuknummers anvroag’n. Dan klinkt het duur de zaal “Jij komt niet aan mijn komkommertje”. Het allerèèrste verzeuk, het wörd’n netuurlijk gewaardèèrd, mà dan môs de anvroager wà zelf zing’n. Det hebt ze wèèt’n. Binn’n de kortste kèèr’n stun Prins Tieske op de plàànk’n. Het dak gung der of. Hij zung as ne tierelier. De muzikàànt’n wörd’n der stille van. Diss’n Prins Tieske is ech van alle markt’n thuus. Hij spölt saam’n met zien moat Schôônewille in het zesde elftal van ABS. Het schient det ze, al wekken, alle zundaage, hebt e oefent op dit machtige nummer. Zelfs het vlaggeschip hef ter baat biej en de leste plaatse oaver edoane. Met het carnaval vuur de börste kan det allèène mà better en better goan. Diss’n rasecht’n muzikàànt, basgitarist biej de band A live breg het carnavalsfeest in ôôns Battem noar ongekende hèugte. Zörgt er vuur dàj’ der biej bint, at e zien “Kumkummerke” wier löt heur’n. Noe zöj’ oe allèène nog ofvroag’n of disse man ôk nog nen achternaam hef. Doar biw we nog krààmpachtig noar an ’t zeuk’n. Vuurlôôpig dèup e wiej ‘m, Prins Tieske, A live, van ABS tut de Aap’nhuuze. Doar könt de Battemse Pôômpers met vedan. Lèu geniet van al disse ongein, doar is al armood genog in de wereld.