Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Iedere keer nen andere pette..

’S mäns eerst nog eaven de karnavalspette op. Ja de elfde van de elfde lig achter ons en dan is Prins Carnaval her en der in het landschap te zeen. In de loop van de dag maakten wie ons kloar vuur Sunterkloas. De goeie man zôl, noar joaren, bie de kleintjes an huus kommen en doar mos opa en oma toch ôk wal bie weazen.Het duurden nog al veur det de olde baas der was. Kennelijk had e in de verkeerde trein ezetten. Het gekke was, hij had helemoal gen steek op. De kleintjes vunden het prima, tutdet opa der wat van zei. Vergeet Pietje kreeg de schuld. Hij had de steek op de hoedenplanke gelegd. Gelukkig vunden de kinder det heufddeksel en het feest kon beginnen. Het bleek det Sunterkloas ne geweldige konditie had, want binnen de kortste keren hobbeln de hele femilie in de polonaise achter Kloas oom an. Met een half uur mos de olde baas gelukkig vedan, want anders kwam e niet rond. De kinders waren drok an het spöllen met de kedoos en noa een sloapmutske, gungen opa en oma op huus an. De andere morgen, 1 december, de eerste advent. De boerenpette gung op, op noar de Holterbarg. Zo mistig as het thuus was, op de barg an de Plaggenweg scheen de zunne volop. Met zien vieren begun de hoornbloazers an het bekende rondje. Van alle kanten kwammen de toeheurders um te lustern noar de mistieke klanken uut die olde heurns. Veur de kommende zundaagen zal de schreeuw um lech, de ankondiging van het Christuskind, het verdrieven van boze geesten, van tweie tut dreie, harder en harder, blieven klinken oaver de flanken van de Barg. Netuurlijk, bie dreug weer. Goat er maar is kieken, alleene al de prachtige natuur, doar op den Holterberg, bie de parkeerplaatse, is meer dan de meuite weert, um der een uurtje rond te wandeln.