Knipgat

Ie maakt wat met àj’ in de wereldstad Lôô wont. Wekken làànk was de hoofdweg vuur een gedeelte e slött’n umdet er her en der nieje leiding’n mônn’n word’n eleg. Det kan gebuur’n. Wiej krèèg’n vuur ’t èèrs te maak’n met stoplecht’n. Det was ne raare gewaarwording. Stoaj’ mill’n in ’n nach te wach’n vuur rôôd. Woerumme?

Doar kump hèèmoa niks van de ààndere kàànte en met een grôôt vroagtèèk’n vervolg ie oen’n weg. Noa de dèirde kèèr woag ie ’t er mar op en riej’ vuurzichtig vedan, àj’ noar een tiedje gen mèènse vernemt. Gelukkig den armood was achter de rugge, mà toen wörd’n de weg ne wekke làànk hèèmoa of e slött’n. Wat noe wier! Nôh, doar kôm ie achter àj’ vuur de èèrste kèèr wier duur Lôô könt rie’n. Met een röstig vaartje drèèj ie de bôch duur en begint oe of te vroag’n wat er noe precies an de weg is edoane. Dan in één kèèr kriej’ nen opdonder, wat is det? Ie vleegt oaver ne niej’n drèèmpel. Det is vaste één van de dinge diet ze hebt an epast. Veerder köj’ neet zeen det er iets gebuurd is en vuur daj’ der arg in hebt kachel ie oaver de centrale rotonde. Ie zit oe of te vroag’n wat ze toch in hemelsnaam hebt an e past. Ie wordt rap wakker eschudt uut oen’n drèum. Biej het uutrien van Lôô wier zun ne rot drèèmpel. ’N auto möt er ech an wenn’n. Op weg noar ’t zwembad bint de drèèmpels völle vrèindelijker. Det hadd’n ze vuur miej in Lôô zelf ôk wà meug’n wèèr. Mà good, zie haalt er de snelhèid wal met uut ’t verkèèr. Noa twei, drei kèèr loaj’ het gas iets eerder lös, um net noar den bult oen snelheid wier an te pass’n. Netuurlijk, het is àmoa vuur de vèilighèid, mà zie hadd’n der bes een bordje “knipgat” biej könn’n zett’n. Àj’ der vuur de èèrste kèèr langs goat met ‘n auto of nog zweuirder materieel dan maak ie ne sprôônk, doar zôj’ vleegangst van krieg’n. Lèu noe bin j’ àmoal e waarschouwt. Hèinig an in Lôô.