Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Lôôp noar de Pompers

Noh det kan, in ieder geval, op carnavalsmoandag. Dan is het wier zo veer. Biertapwedstried’n bie de Brink, met as heugtepunt de bekendmaking van de Battemmer van het joar. Wie kump ter in het riegje van Battemmers, diet disse eervolle onderscheiding in het verleden al hebt meugen ontvangen. Nemt de meuite um eaven te kommen kieken bie de residentie van de Battemse Pompers. Het is er altied onmeunig gezellig.Onder het mom van de biertapwedstrieden wordt de verschillende carnavalsverenigingen uut de buurte ontvangen deur Prins Jeroen den Eersten en adjudant Huus in ’t Veld. Dit joar, veur het eerste, bint er wijnrondes veur de vrouwelijke deelnemers. Ook binnen het carnaval slöt de emancipatie keihard touw en det is een goeie zaak. Prins en Adjudant zult de kommende daage oaveral te zeen weer op hun rondje deur het darp. Op de zoaterdag trek hij vaste wel eaven noar Keunedarp um de optocht te bekieken. Doar kunt trouwens alle Battemmers met trots noar toe goan sinds det ABS de trotse liestanvoerder is in de voetbalcompetitie. De groote concurrent, Hoolten, kreeg tegen Zwolle nen pienlijke nederlaag vuur de kiezen. Oolders opgelet, zundagmiddag bint de jonge kinder an de buurte. Speciaal carnaval vuur de kleinste jeugd. Det mooie groote springkussen kun ie de kleintjes en oe zelf neet ontholden. Carnaval ie mot er van holden. Mog het noe zo wezen dat ie der ech niet tegen kunt en ook de reagen van de leste tied is oe te völle, dan pak ie de auto veur een tochtje richting de Alpenlanden en dreeit doar oen rondjes op de piste. Eerlijke is eerlijke, het lik ter neet arg op dat wie dit joar nog onze rondjes riedt op de iesbaane in Battum. Of ja, het mot wear op de iesbaane van de Battemse Pompers. Zo zeet ie maar, die Pompers bint het hele joar aktief en niet alleene met Carnaval. Alaaf.