Plan De Brink
Klik hier om de 3D animatie te bekijken

Lotgenoten

Het begin van het joar was good te neumen, alleene het weer is één en al triesterigheid. Niks anders as reagen en völs te warm veur de tied van het joar. Een mense zol der zwoarmoedig onder worden. Zo veulen det ook. Het worden alleene maar arger. De wind kwam in één keer uut ne heelen anderen hook. Uut het westen, maar of det noe de oorzaak is, loat wie in het midden.Links en rechts um mien hen heuren ie det er ne griepgolf was. Ne hoop snotterige mensen, diet oe links en rechts trakteert op besmettelijke bacteries. Meestal geet det wel good, maar disse keer hef ter eene volop raak geschötten. De andere morgen, wakker worden met troanogen en ne loopneuze. Binnen de kortste keren waren de zakdeuke vol en moest er nieuwe vuurroad worden an e leg. De keelpastillefebriek dreejen oaveruren. Doar was nog goeie hoppe det het doar bie zol blieven, maar ne dag later was het geblek en het getroan niet van de lucht. Het middenrif kreeg ongecontroleerde aanvallen van plotselinge kriebelhoest te verduren. Alles begun zeer te doon. De vrouwe bleef zo veer meugelijk uut de buurte. Vrog op de oavond waren de knollen op en worden het berre opgezocht. Compleet de klokke rond gesloapen en nog neet ech lekker. De visite ofgezegd en gekeuzen veur de ruste. Gelukkig iets better, het heult niet oaver, maar lotgenoten, hoold mood, het geet de goeie kante op. De krokussen stoat bienoa in bleui, de veugeltjes hebt al nösteldrang en de sneeuwwklökskes? Zie bint mie bie disse temperaturen neet opgevallen. Wie bint touw an mooi helder winterweer. De schaatsen um de nekke en op noar de iesbaane. As ie noar buuten kiekt zut het er nog neet noar uut, maar lotgenoten, volgende wekke zal ook veur ons de zunne wier schienen en bint wie uut de greep van de griep.