Männ’n kan alles ààns wèèr

Sommige dinge in ‘t lèèm’n kômt totaal onverwachts. Wat te dèènk’n van de voetballers uut Milaan. Vuur ne wekke trugge wörd’n ze nog of eschildert as topvoetballers. Ie zet er oe vuur en noa tien minuut’n lig ’n èèrst’n bal in ’t verkèèrde netje.

De keerls uut Parijs loat er gen grös oaver greui’n en stuurt ze met de grötste nederlaag aller tied’n noar huus hen. Het kan nog gekker. Telstar, zèumdes in de competitie van de tweede divisie, promoveert tèèng’n een armetierig Willem 2. Het is wat, noa zèum en vèèrtig joar wier noa de eredivisie. Het glas is half vol of half leuig. Willem 2 noar één joar trugge noar de kökk’nkampioen divisie. Wat een fees en wat een verdreet. In Italië wint Simon Yates onverwachts de Giro, dikke wille in Engelàànd, mà vedreet vuur Del Toro uut Mexico. Het bint mà de klèine dinge in ‘t lèèm’n. Ie maakt ’t met en goat wier vedan. Sommige zaak’n blieft langer hang’n. Alle daag’n is ‘t raak. Gaza blif een compleet slagveeld. Woenneer stopt ze der noe is een kèèr met! Het is um gek van te word’n. In één kèèr zeek’nwaag’ns en plietsie oaver de weg. Wat noe wier? Het belöf neet völle goods. An ‘t begin van ’n dag lik alles nog zô môôi en noe zit er femilies deepe in de rouw. Het geet in een roazend tempo vedan en doar is altied wal iets wat oe raakt. In Frankfurt trekt ze rèènte noar boam’n en wiej meugt betaal’n. Mèèns’n diet het water al an de lipp’n stund, nog veerder in de stress. ‘n Broen’n kan ‘t àmoa neet meer trekk’n. Wilders gôôit ne lappe vlèis in de arena en stijgt in de peiling’n. Woer goaw we met zien all’n op an? Geet dan alles verkèèrd? Nee, het weer blif redelijk good, lekkere temperatuur’n, met zô of en touw ne bujje. Oh jee, doar stort ne barg in, kump det duur ’t klimaat? Het zal àmoa wà. Ie könt alle narighèid in de wereld neet op oen’n nekk’n nemm’n. Loat ’t, as ’t kan, een betje langs oe hen goan. Geniet van ‘t lèèm’n, zô lange as ter te geniet’n veuilt. Männ’n kan alles ààns wèèr.