Plan De Brink
Klik hier om de 3D animatie te bekijken

Meer as ne sloot

Sommige dinge loaj’ langs oen of glieden, mar as de Schipbekke wördt e neumt as ne gewonen recht’n sloot, dan schrik ie wakker. Dan bint er kennelijk leu diet er niks van snapt. De Schipbekke met ne historie tut veer trugge. De Marckelse Bekke, de Hunnepe, de grenze tussen Salland en de Geldersen.Noe een getemd riviertje mar in vroggere tieden kon e meer dan weeld worden. Oaverstromingen tut in het Darp Hoolten, nog gen honderd joar geleden. Riedt er mar is langs en ie zeet nog stukken van ziene rieke geschiedenis. Netuurlijk zit er neet völle buchte in, maar den eenen bocht, de ofslag noar Loo, doar lig een stuk geschiedenis. In de veerten zeet ie de Menop, prachtig mooi verbouwd. Doar op die stea trökken de reizigers deur de Bekke op weg noar de Hof van Battum. Een eindje veerderop konnen ze sloapen bie De Bonte Os of Scheperboer. Op de andere kante stun ooit het machtige kasteel Arckelsteijn, an de Schipbekke. Bie de Pothaar wörden hoolt geladen op de kleine zumpkes. Hoezo, ne sloot, goat er is kieken. Doar op de stea woet de Sallandse Landweert en de Botterbekke, de Schipbekke raakt. Natuur en cultuur op ne postzegel in disse woelige wereld. Loat wie der neet te kleinerend oaver doon, het is wal net den postzegel woet wiej meugt leaven. Johanna van Buren leut, in zie dichterlijke vrieheid, de Bekke kronkelen van schoonheid. Die schoonheid is ter nog altied. Ie moet het willen zeen. Johanna van Buuren zag det en hef ons mooie gedichten noar geloaten. Wie greuiden der met op en ooit was zie de inspiratiebron van één van mien allereerste gedichten. Die kronkels van disse dichteres valt better te warderen as den kronkel um onze Bekke te betitelen as ne gewonen sloot.