Meikèèvers

Wat een lekker weer. Èèm’n buut’n zitt’n, het kan wier. Nog gen vief minuut’n later vlug oe den èèrst’n meikèèver um de oor’n. Het jachtinstinkt kump boam’ndriemn. Snel haal ie de pette van de kapstok en ne minuute laater zit de meikèèver in de pette. Nen öllieslager.

Een berichje noar de klèinwichter. Zie wilt met op jach. Twei klèine jampötjes, een paar gèètjes in het deksel en de jach kan beginn’n. Onwillekuurig lôôp ie à vaste ôônderlangs het singeltje en ie zeet dat er völle bint dit joar. Op ’n stool nèimp de tied oe met. Vaa is met oe ‘n Beelt in egoane. Meikèèvers van de eek’nbèume schudd’n. Hij trapt een kèèr tèèg’n de stam an en zô woar, doar valt er paar noar beneed’n. Die köw we môôi verhààndel’n op het schoolplein. Een stuk of wat goat er wal in zô’n lucifersdèuske van zwaluw. De mèister mag ’t neet zeen. Ie heurt ze, deepe in oen boezeroen, krabb’n tèèg’n het dèuske an. In ’t spölkwattèèr wordt ze verkoch. Ne koning vuur twei boks’n, nen öllieslager vuur ne boks’n en ne foete. De koninginne wordt e ruilt vuur ne mulder en ne slager. ‘S oamds lig ie met de jongs wier langs ’n bosràànd. Zô gauw aj’ der ééne zeet, klinkt het van “meikèèver”. Iedereene met de pette in de anslag, um ‘m te vang’n. Môôie tied’n, compjoeterspöllekes, nôôit van eheurt. Het voert oe trugge noar de warkelijkhèid. ’s Middags breg ie het meikèèvervirus oaver noar de jong’n. Opa goa j’ met hen vang’n? Binn’n de kortste kèèr’n hebt ze der bèire een stuk of wat in het jampötje. Nee, zie wordt neet meer verhààndelt. Zie möt ze lösloat’n van vaa. Hij kent de gewoonte van het verhààndeln à neet meer. De mèèst’n vleegt wier vôt, een paar goat er trugge in ’t pötje. De kinder hebt de andach al biej de ei-foon . Pas later op ’n middag komt de meikèèvers wier in beeld. Een paar bint er goan paar’n. Det is wat niejs. Zie hebt ‘t nog nôôit eerder ezeene. Hoe dichte lèèm’n wiej eerder biej de natuur. An ’t èine van de zundag wordt de leste kèèvers ôk lös eloat’n. Doar is gen markt meer vuur.