Mooderdag

Èigelijk möt ‘t det alle daag’n wèèr. Mà toch, mar één kèèr in ’t joar. De kinder bint er ewes. De bloom’n hangt en stoat wier te prôônk’n in ’n tuin. Het weer hef op alle menèèr’n met ewarkt. Lekker, ’n hèèl’n zundag in de buut’nlôch. Zelf hà ‘k de trampoline installèèrt zôdet de wichter ôk eur vertier hadd’n.

Det lukk’n wôônderwà. Binn’n de kortste kèèr’n môs ôk de klèinste nötte der in en der uut. Det begun noa twintig kèèr buur’n te verveel’n. Een träpke der biej en joa heur, zie klum der zelf zô in en uut. Een koddig gezichte, zunne potnötte, drei törve grôôt, as ne drôônk’n keerl, op de trampoline. De voetbaldoeltjes wadd’n ôk noa buut’n ehaalt. De ôôld’n kekk’n touw vanuut de tuinsteule, genietend van een drankje. Of en touw heur ie scheeldweure, at de favoriete voetbalploeg de kampioenspunt’n löt ligg’n. In één keer een geschreeuw. De kleine nötte is neuis het opstapje trechte ekömm’n. Ie zeet ’t gebuur’n, niks an de hàànd, mà het mooderharte is starker en is ter as de kipp’n biej. Doarumme is mooderdag zô bezunder. De eene mooder zörgt vuur de klèintjes en de ààndere mooder dut eur beste um ’t iedereene mà noar de zin te maak’n. Det lukk’n prima. Lekker geniet’n van ’t môôie weer en van mekaa. Inmiddels bint de doeltjes weg en beginne wiej an ne nieje wekke. Hoppelijk breg ’t ôôns völle môôi weer en zo of en touw ne bujje rèèg’n. Het begint links en rechts à wier aarig drèuge te word’n. Zô blieve wiej mà duur klaag’n, zô is ’t te nat en dan wier te drèuge. Van binn’n en van buut’n nat is ’t allerbeste. De bevrijding heiw we langs ôôns hen loat’n glie. Zôll’n der nog lèu wèèr, diet er biej stille stoat det de stààmp’nde leerz’n vuur viem’ntachtig joar duur oôns darp hen gung’n en wat vun ne ellende of det hef egèèm’n. Hollààndse suldoat’n vöcht’n der tèèng’n, um ôôns làànd vriej te hôôld’n. Het môch toen neet lukk’n. Jonge jongs uut ôôns hèèle làànd, völle blèèm’n der vuur altied op ’n Grebbenbarg. Vriejhèid, het lik zô gewoon, mà blif het grötste good. Geniet’n van alle dinge in ’t lèèm’n en van mooderdag.