Môôi weer spöll’n

Det doo we àmoal wal is .Mà noe, met al die onzekerhèid in de wereld, goaj’ der oaver noadèènk’n. Wie hef ter noe al die tied môôi weer espölt? Is den kôôld’n oorlog wal ôôit vuurbiej egoane, of heiw we vanof die tied môôi weer espölt. De muure was evöll’n, iedereene bliej.

De verdediging wörd’n of eschaalt en het gas kwam met geuld’ns teglieke uut de grôônd. Meerdere Ôôst Uuropeese làànd’n kwamm’n biej ’t West’n en de verdediging leuw we oaver an Amerika. Hèinig an begun Ruslàànd zich zörg’n te maak’n, mar Uuropa leut die zörg’n oaver an Amerika. Verdediging, det was neet meer nèurig. Noe met die onmeunige aardverschoeving in Amerika biw we wakker eschudt. Amerika dut ‘t neet meer allèène. Wiej zölt ôônze eeg’n bokse meer en meer op mönn’n hôôld’n. De tied’n bint veràànderd, mà möw we oôns zörg’n maak’n? Nee, mà wà wakker word’n. Hoe stoaw we in de wereld? Pakt mekaa biej de schoolders. Wat wil Uuropa? Wat wil Amerika, wat wil Ruslàànd en China? Doar zal eproat mönn’n word’n, netuurlijk neet met de pers der biej. Sensatie zitte wiej neet op te wacht’n, ôk neet op eindelooze rieg’n liekzakk’n. Der an met de lippe, wiej goat àmoa vuur vrèè. Môôi weer spöll’n, het is toch een apart begrip. De warkelijkhèid neet ôônder ôôg’n will’n zeen. Heiw we det ôk edoane met het Groninger gas? Gebuurd ’t neet alle daag’n nog in Den Haag? Kieke wiej amoa neet te völle weg van de warkelijkhèid?. Wiej, met zien achttien miljoen op den speeld’nknop in de wereld? Môôi weer spöll’n, het blif geveuirlijk. Wiej möt het oaverloat’n an ôônze bestuurders. Wiej goat vedan met ôôns lèèm’n. Noa een paar machtige daag’n met buut’ngewoon vuurjoarsweer begint disse wekke met ne buut’ngewoon’n verjeurdag. Dika Bosschers, ie wèèt wà van Nieëndiek is, moandag tien meert, honderd joar ewörd’n. Honderd joar, dan besef mar is wier, hoe rap of de tied geet. Zô biej’ bie de oolders op de brulfte en zô biej’ zestig joar veerder. Dika en femilie, vanof disse kaànte, van harte gefilstèèrt, knupt ter nog mar een joar biej an. Môôi weer spöll’n, het is toch een apart begrip.