Plan De Brink
Klik hier om de 3D animatie te bekijken

Noar de APK

De vakanties zit er op. Wie moet allemoale weer op gange kommen. Sjonge jonge jonge wat een hette en tjeetjemina wat een water. Met allebeide waren wie blie, maar meer dan veertig groaden is toch wal een betje te völle van het goede. Ie zollen der meu en lui van worden.Miene meuheid gaf ik op de hette tut det de vrouwe zei, goar ie mar is noa de APK. Ik wus ageet niet wat het was, maar zie kontroleert oe doar op het blood, de prostaat, suuker en nog völle meer. Goeie road volg ie netuurlijk op en zo trok ik op noar de pille. Denk ter umme dat ie een nummertje trekt as ie binnenkomt. Het begun al good. Doar zat wal een man of tiene veur mie en het nummerapparaat had det neet kunnen verwarken. Dan maar zonder nummer. Zo zoch ik mie een pleitske. Rech tegenoaver mie, ne grooten poaster met ne dame, kennelijk in blijde verwachting. Zat ik wal op de goede ofdeling? Kennelijk wal. Het leup behoorlijk uut. Het nummerapparaat worden nog wier gemaakt en eindelijk kwam ik an de buurte. Vakkundig worden de bloodaore opgezocht en een betje lichter gung ie op huus an. Gelukkig, de uutslag was positief, maar de meuigheid is nog niet oaver. Wie hebt de droad maar weer opgepakt. Feest met de buren, vieventwintig joar getrouwd. Ballonnnen bloazen, gezellig bie mekaar zitten, drankje der bie, wat wil ie nog meer. As de dag van gisteren kon ik mie die trouwerieje nog vuur de geest halen. Viefentwintig joaren lief en leed. De tied vlug vuurbie. Op noar de Karsdagen. Veur dat wie der arg in hebt is het weer zo veer. De dagen wordt al korter. Kun ie ook niet good op gang kommen, een keer noar de APK kan gen kwoad. Zie hebt mie gezegd, volgend joar weerkommen.