Old papier en plestiek

Het vuurjoar kump ter an. De muziek is al an de deure ewes met compost en potgrond. Wat maakt ze het ons toch lekker makkelijk. Het zunneke wint alle dagen an krach en de vrouw is bezig um de leste harfsblaa weg te warken. Het is ne drokte van belang.Doar geet ne groten trekker met old iezer veurbie en dan moet het olde papier nog kommen. In ne grote kruuwagen steet het al an de weg te wachten op vervoer. In de hoast um het doar neer te zetten struukel ie in de schuure oaver een barg plestiek. Haalt ze det ook op? Nee heur, det blif alleene achter um te wachten op ander vervoer. Plestiek, wie zeet alle dagen de leavensgroote versmering vuurbie kommen op de tillevisie. Zôl det gen geld weert weazen veur de schoolen of wie dan ook? Het wordt oaveral verwarkt. Mischien een gat in de markt. Misschien bepaalde soorten diet doar bie uutstek veur in anmarking komt. Wie weet. Een feit is, det ie alle wekke wal een paar zakken vol plestiek hebt. Zôl toch mooi weazen as ie, samen met het old papier en het olde iezer, ook die plestiek rommel ne bestemming kunt geven diet geld oplevert veur de gemeenschap. Misschien kunt ze niet direkt alles gebruuken, maar wie bint toch al an het ofval scheiden en veur het goeie doel kunt wie nog wel ne stap extra doon. Ik zee het al veur mie, ne groten trekker met een balenpersje der achter en doar geet den zak in. Baaltjes van 25 kilo wordt op elaad’n, een dubbeltje de kilo, tel uut de winst. Det is de theorie, noe de warkelijkheid. Het zal nog wal een tiedje op zich loaten wachten. Veurlopig haalt de gemeente het gelukkig op, maar as ie de versmering oaveral in de wereld zeet, slöt oe de schrik um het harte. Doar möt völle meer an edoane worden en alle kleine betjes helpt.