Plan De Brink
Klik hier om de 3D animatie te bekijken

Op noar Mirrewinter

Lekker vreezend weer. Het begint er op te liek’n. Nog een klèine twei wekke en dan biw we biej de Karsdaag’n. Wiej zölt ze wier beginn’n net as eerder. Twei joar môch het neet duur de corona, mà noe geet het wier gebuur’n. Karsoamd half vieve, de keerskesceremonie op ’n Hoolterbarg.

Met het invall’n van ’n tweiduuster koppelt de mèèns’n boam’n noar ‘n Barg. Vanuut de veert’n heur ie de midwinterheurns. Zie roopt um het lech, det straks oaver al die graav’n zal schien’n. ‘N ôôl’n roop verstarft oaver ‘n Barg. De schoolkinder stroomt, ôônder begeleiding van het indringende geluud van de doedelzakspöllers, ’n Canadeez’n karkhof op. Karsoamd, net vuurdet de lèu an de karsmoaltied of de pannekooke met wors goat, wordt de gesnèuvelde jongs herdach. Vuur Battem speciaal Joseph William Campbell. Hij gung ziene meuige vuur, biej het oaverstekk’n van de Schipbekke. Wiej wörd’n bevriejd, mà hij betaald’n, met völle ààndern, de hèugste pries. Zô hef ieder graf zien eeg’n verhaal. Wiej meugt ze nôôit vergett’n, vuural noe de oorlog wier zo vlak biej de duure is. Het is moesstille at de schrille muziek van de doedelzakk’n stopt biej het grôôte kruus. Onmeunige stilte. Nog één kèèr klinkt den ôôlen roop oaver het duuster word’nde eereveeld. De Börgemèister nèimp het woord. De keulte trekt oe in de kleere. Ie zeet de kinder opstoa en een paar minuut’n later stoat er 1394 keerskes biej de graam’n van al die suldoat’n, diet hier in de umgèèving het lèèm’n hebt eloat’n vuur ôônze vriejheid. Dartienhonderd vèèr’nnèèngtig jonge mèèns’n, ieder met zien verhaal. Àmoa vaders en mooders diet berich krèèg’n det de ongelukkigen nôôit wier thuus zôll’n kômm’n. De keerskes zölt wier bràànd’n. Deepe ôônder ’n indruk goat de mèèns’n op huus an, op noar de warme kachel. Het besef dat wiej à 77 joar in vriejheid lèèft. De gedachte det de mèènshèid, der in al die joar’n, niks van hef eleert. Het stemt oe vedreetig. Al die verspilde jonge lèèm’ns, loaw we hopp’n det het ôôit ààns wördt. Stillekes zeuk ie oen’n weg noar de warme kachel .