Slech esloap’n

Ie zölt oe ofvroag’n, woerumme? Van schrik scheet ie wakker. Oen kluppie met 6-0 verleurne. Hèinig kôm ie biej zinn’n en beseft det het neet ABS is, mar Ajax. Het zal oe mà gebuur’n. Ie soezebolt weg. Zô völle môôie dinge bint er passèèrt, Max Verstapp’n wint gewoon wier en Van de Poel ridt de kunkurrentie op minuut’n. Toch kump, in ’n sloap, het slechte niejs wier boam’n driem’n. Ne bom op ne kerncentrale, woer biw we met gangs?

De staat wördt an eklaagd, umdet wiej de vluchteling’n tèèg’n hebt eheul’n biej Turkije. Vuchteling’n, zie blieft binn’nstroom’n en ôôndertuss’n bint ze in Den Haag nog deftig an ’t formèèr’n. Het blif anmôddern. Het schip van Staat dobbert stuurlôôs rôônd. De lèu diet möt prebèèr’n um het op koers te krieg’n wordt, op de tillevisie, Peppi en Kokkie eneumt. Achthonderduuzend Toetsies, zo mà vermoord, wier zit ie rech op in berre. Gelukkig het is de herdenking. Onvuurstelbaar, Israel trek zich trugge uut Gaza. Zôl het dan toch? Ie blieft hopp’n det de mèènshèid tut inzich kump. Het glas half vol of half leuig, het is mà net waj’ der van wilt maak’n. Loaw we ’t dan toch mar op half vol hoôld’n. Het vuurjor kump ter an. Hoe fijn is ’t aj’ wier met oen all’n biej ne vèurpot könt zitt’n. Geniet’n van het môôie vuurjoarsweer. Ie zeet de natuur uut de knöppe scheet’n. Narighèid, niks an de hàànd. In Bergeijk is ter e schött’n, nog veerder weg bint er mèèns’n um esloane met de boot. Het zal àmoa wà, wat möj’ der met. Gewoon an ne nieje wekke beginn’n. Legt de telefoon opzied, loat de tillevisie met röste en ie zölt zeen, dàj’ zelf ’n sloap ôk better könt vatt’n. Lekker nog èèm’n weg doezeln, veer van alle narighèid en hopp’n det het röstig blif um oe hen. Het schip van ABS lig wier een betje op koers, 1-0 winst tèèg’n Vasse. Noe die knappe köppe in Den Haag nog, zie könt toch neet eeuwig vedan formèèr’n?. Welterust’n.