’t zwarte schoap

Water, water, water

Vol verwachting trek ie de gerdienen lös. Van schrik sloat ie ze weer dichte. Gries weer, de reagendruppels gliedt eindeloos langs de roete. Maar ja, ie hoolt de dag neet tegen. De Olympische spelen bint begunnen en veurdet ie der arg in hebt, klinkt het eerste Wilhelmus deur de kamer.

Toch geet het allemoale neet van zelf. De eene geet onderuut en de andere steet huulend van verdreet zien verhaal te doon. De gerdienen moet toch maar lös en vertwiefeld kiek noar die eindelooze grieze loch. Det wordt weer een dagje binnen zitten. Het gaskacheltje gromt de eurootjes deur de schoorsteen. Allemoal van het gas of. China hef net miljarden en miljarden kubieke meters gekocht van Rusland. Spanning an de oostgrenzen van Europa. Het zal toch neet? De vief kilometer nadert ziene ontknoping. Nederland steet boavenan. Nog eenen Zweed. Snel eaven ne kleine boodschap. Wat is det dan, ne hagelbujje. Det kan der ook nog wel bie. De hagelsteender komt deur het wc-raampje noar binnen. Wiej goat weer gold winnen. Twee seconden veur, nog een paar rondjes. Dan geet bie Zweden het gas ter op en in de allerleste ronde bint wiej maar tweede. Een prachtige prestatie. Buuten blif het reagenen. De eerste plassen stoat al in de weiden. De familie kump neet. De kleine jonge hef slecht niejs, in één keer corona, maar wel drei keer gescoord. Gelukkig valt er genog te kieken. Nee, neet buuten. De reagen valt nog altied met bakken uut de lôch.. Eaven een Chineesje pakken bie de Olde Mölle. Onderweg zeet ie de slooten en de weilanden blank stoan. De zaak steet te koop, maar gelukkig blieft ze toch nog lös. Het kan nog wel een joar vedan goan. Het is te hoppen dat al die beparkingen gauw veurbie bint. Het buffetje is veurtreffelijk en de mensen bint allervriendelijkst. Op huus an, nog altied genog te kieken. In Limburg löp het water al weer deur de stroaten. De ontucht met jonge vrouwen is deur gedrungen tut in de krochten van Ajax. De watermeter steet op dartig millimeter. Geloaten zeuk ie het bedde op. Water, water, water, morgen weer ne niejen dag.