Teun, vuur, Gijs

Wie hadden al een Wim in de buurte en dan denk ie dat ie, volgens het olde letterplankje, an de buurte bint. Maar nee heur, de buren gungen direkt deur noar Gijs. Helemoal okee, de ooievaar is geplaatst. Det ging niet zonder problemen. Het blek det de kersverse vader hem de veurige keer de nekke al had umme gedreijd. Hij is ter noe hoppenlijk achter, det het één en ander niks met de ooievaar te maken hef. Gelukkig, de kop zit er weer op en iedereene kan zeen det er een nieuwe wereldburger bie is.De kop is ter of, de uutneudiging, um het keerltje te loaten pissen, is binnen. De koffie hebben wie alvaste bie de buren genuttigd en dan schrik ie van alle narigheid diet her en der hef touw gesloane. Links en rechts wordt femilies getroffen deur narigheid. In het besef dat det alle daage vedan geet, heur ie het an en leeft met, met iedereene. Op de tillevizie wordt ie geconfronteerd met het fenomeen, vief en zeuventig joar bevrijding. Gruwelijke taferelen vleegt oaver de beeldbuis en ie kunt neet begriepen det mensen mekaar zoiets andoot. Het grote zwiegen, drek noar den oorlog, hef de oaverlevenden vaake piene gedoane, doarumme is het good det onze regering noe openlijk het boetekleed antrekt en excuses anbiedt. Better laate dan nooit, worden der gezegd, maar het is duudelijk, dat het vuur völle oaverlevenden te laate is. De generatie diet Auschwitz en al die andere gruwelkampen hebt oaverleeft, zult oaver een joar of wat neet meer onder ons weazen. Het is good det de fakkel van herdenken oaver wordt genommen deur onze jeugd. Het mag nooit meer gebeuren, maar toch, kiek is veerder oaver de wereld! Wie hebt noe gauw 75 joar vrieheid. Loaw we hoppen det onzen niejen wereldburger in vrede mag opgreuien. Wie wacht nog maar eaven op Teun, of wordt het dan toch nog Jet?