Tour de France

Wakker word’n. Vief juli is ’t zo veer. De wielerfanaat’n könt wier met spöll’n met de Tour de Battum. Hèèle volksstamm’n bint à joar’n besmet met dit virus. Gen wôônder, want het geet neet allèène um het algemeen klassement. Doar bint alle daag’n prieze te winn’n.

Drei wekke weg van alle narighèid en de machtige tillevisiebeeld’n bekiek’n van de rechtstreekse verslaag’n. Èèm’n trugge noar de tied van Jacques Anquetil tut an an de winnaar van vuurig joar, Tadej Pogacar. Môôie verhaal’n zölt ongetwiefeld het lèèm’nslech zeen. Nieje wielerheld’n zölt opstoan. Wie kent er neet de uutspraak van Wim van Est. Hij fietst’n in ne bôch rechduur. Deepe in ‘t ravijn lag e. Zien harte stun èèm’n stille, mà zien pontiac horloge leup nog. Det onvergettelijke commentaar’n in 1968, Jan Jansen hef de tour ewunn’n. Biej een klein zwart wit tillevisietje zag ie ‘m in de allerleste etappe sprint’n noar de gele trui. Ie wèèt nog precies woer aj’ wadd’n. Ôônze Jopie Zoetemelk môch det in de joar’n tachtig nog een kèèr oaverdoon. De leste joar’n bint de Nederlàànders minder in beeld, mà wie wèèt, dit joar wier een stuk of wat etappewinnaars. Zoaterdag begint ’t spektakel en dan drei wekke làànk. Niks gen geouwhoer van Navo top of verkiezing’n. Lekker oen formuliertje invull’n en alle männde kiek’n oj ’t àmoa good hebt in eschat. Ie könt er röstig umme met vakààntie goan. Weg met de zörg’n. Èèm’n de boel de boel loat’n. Vuur de thuusblievers lekker op de fietse noar ’t Okkenbrookse feest. Ie zeet der is genog um van te geniet’n. Neet vergett’n um oen formulier op tied in te lèèvern. Drei wekke làànk de ôôle wielerverhaal’n noar boam’n haal’n. De held’n van den Nederlàànds’n Barg, neumt ze mar op, ôôndermeer, Theunisse, Rooks en Zoetemelk. Onvergettelijk! Zôl Pogacor dit joar touwsloan. Wiej goat het àmoa metmaak’n. Drei wekke lekker lekker fiets’n duur Fràànkriek, drei wekke alle narighèid achter oe loat’n. Völle wille, want doar geet ’t umme.