Plan De Brink
Klik hier om de 3D animatie te bekijken

Van het eene uuterste in het andere

Zô zat ik noar de tillevisie te kieken noar nen architekt, dent in China van die onmeunige bouwprojekten an het ontwikkelen was. Zo groot dat ie oen ofvreugen hoevölle arme sloebers of doar vuur hebt mötten wieken. An alle kanten wörden eur de loftrompet toe estökken.Onbewust kwammen de grote verschillen in de wereld bie mien boaven. Eaven later kek ik bie ons in de götsteen en zag hoevölle plestiek of ter zo maar weg egooit worden in eenen dag. In Amerika komt de arme sloebers uut het zuuden noar de Verenigde Staten. Trump wacht ze op met een legertje suldoaten. Hoe lange kan dit nog vedan goan. Wanneer geet de wereld der echt wat an doon. Ech wat doon, zonder det het geld veurop steet. Het weer was buutengewoon mooi. De vrouwe wol op slachtvisite bie de Pothaar. Ik bin blie dat ik met bin egoane. Wie hebt er van genötten, hoe good of den slager met het mes umme kon goan. Het geslachte varken höng veur de dellenduure en ie kon der zo stukken van kopen. Terugge noar kleinschaligheid, althans zo op het ooge. De huusslachter vertellen ons precies hoe of het varken in mekaare zat. Een mager varken, maar het schreeuwen niet meer. Ok bezeukers moggen een stuk van het varken of snien, maar pas op, die messe bint vliemscharp. De grapjes waren der netuurlijk ook. Toen één van de bezeukers een stukse vleis wol goan snien, worden hem an eroad’n, toch eerst maar ziene vingers te tellen. Het was al met al meer dan de meuite weert en veur herhaling vatbaar. Noe àmoal nog een klein stäpke doon, trugge noar de oorsprong van het lèèven, neet altied det grootse, neet al det ofval, mar een stukske vleis, bienoa rechtstreeks van de boer. Vuur ons ankommende wekke, moos met dikke ribben, vars van het varken.