Van links noar rechts
Hèèl Uuropa dut met. Det wil zegg’n de vèèr starkste làànd’n nog. De eene kèèr wint rechts en in ààndere làànd’n is ‘t net àànsumme. Het geet lekker. Met ne machtigen eindsprint blèèf Groeneweeg’n al die ààndere snelheidsduuvels vuur. Ôk ôônze voetballers blieft nog èèm’n in Duutslàànd. In ne môôie pot trök de Nederlààndse Leeuw an ’t langste èine tèèg’n Turkije.
Wiej bint den zèèpert tèèg’n Ôôst’nriek à lange vergett’n. Noe bint de Engelsen an de buurte. Volgens de kenners, kôw we der èèrs niks van en heiw we ’t noe al ewunn’n. Loaw we ’t hopp’n, dan kiek e wiej zundag met mekaa noar de finale. Wiej loat ’t op ôôns ankômm’n. Woensdag wördt duudelijk wiet er uuteindelijk det leste pötje geet spöll’n. In ieder geval kump ter nog één’n Oranjemars in Dortmund. Vèèrtig duuzend man zet Nederlàànd doar op de kaarte. Van links noar rechts, allèène doarvuur zôj’ der à hen goan. Het blif een môôi sportzommer. At de voetballers op vakààntie bint, goat de wielrenners nog ne wekke vedan um uutèindelijk in Nice te zeen wiet er ’n best’n is. Ôôndertuss’n maakt ze zich in Parijs op vuur het allergrötste sportgebuur’n van de wereld, de Olympische Speel’n. Ie zeet ’t, het blif geniet’n. Met al disse gebuurteniss’n trek het zommer zô an ôôns vuurbiej. De daag’n wordt à wier körter, mà wiej hebt de grôôte vakàànties nog vuur ôôns. De school’n hebt zô gangswieze à vriej of. Èèm’n ne wekke of wat lekker niks doon en dan beginn’n an het nieje schooljoar. Ne klasse hèuger, op nen ààndere schoole, of an ‘t wark. Noe möj’ der van geniet’n, want straks is ’t wier drôk, drôk, drôk en heij’ nänn’s gen tied meer vuur. Wàj’ ôk goat doon, lekker op vakààntie, op een terrasje, lurk’n an een ijsje, of gewoon een kôôld biertje biej huus. Geniet’n blif het tooverwoord, want doar is à genog ellende in de wereld. Van links noar rechts, Uuropees kampioen, Olympisch kampioen, het kan alle kàànt’n nog uut.