Verdreetig

Onwillekuurig lôôp ie der van tied tut tied an te dèènk’n. Vieftienduuzend, twintigduuzend en noe à meer dan drei en dartigduuzend dôôi’n!! Duuzelingwekkende antall’n en det kan zich de kômmende wekk’n nog wà verdubbeln. Of en touw wordt er nog een mèènse lèèmtig uut die onmetbare puunhèupe ehaalt, mà het wördt stiller en en stiller. Netuurlijk, iedern geredd’n is ter eene, mar inmiddels heiw we de beeld’n van onmettelijke antall’n slachtoffers diet, man an man, neust mekaa wordt begrèèm’n.

Hoe möt ’t doar toch veerder goan? Netuurlijk wördt er de kômmende wekke flink de portemonnee etrökk’n, mar de regeering en de hèèle Unie zal royaal en blievend mönn’n biejspring’n um het doar een betje lèèfbaar te hôôld’n en vuural te zörg’n det het geeld good trechte kump. Een klèine twintig miljoen is ter à binn’n, mà het is nog altied ne dröppel op ne gleuiende plaate. Möj’ oe vuurstell’n, ie hebt ’t oaverlèèfd. Tachtigduuzend gewôônd’n, die möt àmoa word’n verzörgd en rap, ààns valt er nog völle meer slachtoffers. Een gebied, twei en een half kèèr Nederlàànd met miljoen’nsteed’n, diet compleet in puun ligt. Ie hebt het “geluk”, dàj’ hebt oaverlèèfd. De bakker lig vuur altied ôônder het puun en de watervuurziening löt het ofwèèt’n. Puunruum’n, woer möt ze beginn’n? Het zal stille word’n. Det wördt joar’n làànk zitt’n in de narighèid en ôôndertuss’n ôk nog bliem’n vecht’n. Het is ne kràànkzinnige wereld, an de eene kàànte, mèèns’n help’n um te oaverlèèm’n en an de ààndere kàànte, oorlogsmaterieel stuur’n, um de lèu ôônder het puun te scheet’n. Zal het dan nôôit ààns word’n? Wie zölt die bleute mönn’n help’n. Wie zölt den Russischen Beer in toom mönn’n hôôld’n. In ieder geval neet touwstoan um op Navo-grôôndgebied te kômm’n, want dan is het hekke van ’n dam en wördt de ellende nog völle grötter. Loaw we hopp’n det er nen uutweg kump vuur iedereene, zôdaw we de puunhèupe könt ruum’n en met mekaa könt wark’n an ne wat zunnigere wereld. Vuurlèupig is het op een paar uur vleeg’n nog stikkeduuster. Prebleem’n as klimaat en gaswinning verblèèkt biej de puunhèupe in Turkije, Syrië en Oekraïne. Hoe meer ôj’ der biej stille stoat, hoe verdreetiger ôj’ der van wordt.