Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Völle geluk en gezondheid in 2020

Zo wie hebt mekaar weer Niejjoar of ewunnen. Derk met de Beer hef ons met ruste eloaten. Wie bint de Karsdagen good deur ekommen. Wie hebt ons op Karsoamd te good kunnen doon an de pannekooke, het oaverdoadige vleis, of het vegetarische, met doarbie de neudige drankjes. Alles in oavervlood, ook met teuifeltjesoamd. Olde gebruuken, oolde verhalen, hoolt ze in eere.Oldejoarsoamd, um twaalf uur gung der veur 77 miljoen de lucht in. De beste wensen vleugen, met rötjes en vuurpijlen, oaver en weer. De neudige slachtoffers kwammen in het zeekenhuus of nog arger. De grootste enthousiastelingen schötten op Niejjoarsdag rustig vedan tut groote wille en deep vedreet van mensen en dieren. De miljoenen uut de lotterieje bint uutgedeeld en ook in ons Battem völlen verschillende verenigingen en instellingen in de prieze, deur de joarlijkse opbrengst van de boeldag. Mooi, dat ie mekaare zo in het zadel hoolt. De joarlijkse Niejjoarsrondes ligt achter ons en zo gangswieze komme wie weer in ons dagelijkse patroon. In Syrië bint duuzenden mensen op drift. De politieke spanningen bint in Irak, Iran en Amerika duudelijk veulbaar. Zie bombardeert mekaar noar de andere wereld. Het veult niet good, as ie oe bedenkt wat vun narigheid of doaruut kan ontstoan. Australië steet compleet in de brand en de klokke tikt onverstoorbaar deur noar 31 december. Gelukkig, wie hebt nog alle tied um der een mooi joar van te maken. Helpt mekaar doar met, hebt wille met mekaar en hoolt mekaa bie de hand, as het àmoa niet zo veurspoedig geet. Op drei Koningen hange wie de Midwinterhoorns an de wilgen en concentreert ons volledig op den daaglijksen gang van zaken. Bie alle wensen en kaartjes, via dissen weg, het allerbeste veur 2020. Blieft gezond, helpt mekaar en maakt er een machtig mooi 2020 van.