Vuur de vieftigste kèèr

Sjonge jonge wat een drôkte. Vol verwachting parkèèr ie de auto. Wat wördt ‘t, gratis parkèèr’n en vief euro uuttrekk’n? Het is ter knap zôômpig, mar ‘t völt met. In lange rieg’n stoat de lèu te wacht’n vuur de kassa’s.

De èèrst’n lôôpt à wier noar buut’n met een paar gescoorde schoffels en hark’n, die wilt nog drôk gangs in ’n tuin. Zelf zeuk ie noar wat köpper, mar ’t is neet te vind’n. De vrouwe bliej. ’s Middags èèm’n trugge vuur de veiling. Ie realisèèrt oe dàj’ vuur de vieftigste kèèr noar binn’n wààndelt. Ôk à redelijk antiek, zöw we mà zegg’n. Met dàj’ ’t terrein op lôôpt begint Orpheus te spöll’n. Netuurlijk, vieftig joar boeldag, de tied vlug. Tuss’n de drôkte duur zeuk ie oe een pleitske um met te könn’n bèèj op de ingebrachte kavels. Kavel eene, ne verrassing. Doar doo ‘k neet an met. Ne slöttelkaste, zôônder slöttel, wat möj’ der met. De veiling begint en in één kèèr steet Caroline van der Plas vol in beeld. Wat ne verrassing. Zie veilt kavel eene, ne rondleiding duur de Tweede Kamer, met ett’n en alles der biej. Het blik meteen het topstuk van de veiling, vèèrhonderd vèèrtig euro. Völle wille doar vuur de kôôper. Dan nemt Grôôt’nhuus ’t vuur de viem’ntwintigste kèèr oaver en kump de vaart der in. Twei emaille reclamebord’n oaver bier. Caroline is kennelijk leefhebber en bödt met. Zie hef neet in de gaat’n det de vuurzitter van BBB, tien meter achter eur, der iedere kèèr oaver hen geet. At ze eindelijk geet stoan en zut, wiet die bord’n zo duur maakt, kan ze ze toch nog kôôp’n vuur honderd en tien euro plus twintig precèènt. De wille is grôôt. Het is neet te hopp’n det ze op disse menèère alle prieze zô opdrieft. De ofslager heult de vaart good in en um half vèère is alles verkoch, behalve ne kantoorinrichting, die blif eenzaam en allèène achter. De toafels met tweede hands spul bint knap leuiger ewörd’n, toch vind ie nog een paar karsläämpkes vuur vieftig cèènt. Och ja, alle joar’n goat er wal een stuk of wat kepot en dan is ’t môôi dàj’ der wat in reserve hebt. Zô kump Jan Splinter duur de winter. De parkèèrplaatse kom ie makkelijk of, volgend joar wier. De boeldag heurt biej Battem.