Wat is ter toch an de hand?

Vol ongeleuf kiek ie noar buuten. An de weg steet het heelemoal vol met huusroad. Goat de buuren verhuuzen of ligt ze in echtscheiding, het zal toch neet?

Nieuwsgierig loop ie der op an en dan wordt het duudelijk. Zie hebt de oaverbodige huusroad an de weg gezet veur de boeldag. De boeldag, het mag weer, boeldag, altied gezellig. Eaven neuzen tussen al die snuusteriën. Ie hebt eigelijk niks neudig, maar toch kom ie weer bie huus met van alles en nog wat. Zo verzamel ie in de loop van joaren zelf ne halve inboedel bie mekaar. Natuurlijk blief ie goan, het is tenslotte vuur de verenigingen in ons darp. Denkt er umme neet zonder oliebollen in huus kommen. Boaven op de rommelkamer steet het noe al vol met spullekes, ooit gekocht op de veiling. Mangs vroag ie of, wat er allemoal met zal gebeuren, as ie zelf goat hemelen. Misschien kump de cirkel dan wal rond en steet het veur een tweede keer op de rommelmarkt. Ie blieft goan. Het is zo gezellig, een paar lampjes veur in de karsboom, een Engels kopje of nen olde langspöl-plaate van de Beatles. Het maakt neet uut, as ie der maar schik an hebt. De veiling, mangs biedt ie maar zo met, in de veronderstelling det er wel eene meer gif. Zo of en touw zit er iets bie woer de kinder belangstelling veur hebt en hangt het zo maar in ne moderne kamer. Doar kump nen trekker, met anhanger an. Netjes wordt alles opgeladen en is het weer glad veur de deure. Zoaterdag steet alles kloar, um te wachten op de nieje eigenaren. Oaver de buren hooft wie ons gen zorgen te maken. Zie bint drok an het blad harken en bloazen. Doar bint ze nog wal een tiedje met gangs, want de novemberstormen stoat veur de deure. Drei en twintig oktober zet het in de agenda. De boeldag van Battem, det mag gen mense missen.