Wat moet wie der toch met an?

Eindelijk. Wie mochten weer allemoal leuke dinge doon. De mensen genötten. De stroaten en de werkvloeren leupen vol. Een feestje hier en ne verjeurdag doar.

Het leaven van alle dag en dan begint het weer. Oploopende ciefers. Oaverleg op het Catshuus. Het zeekenhuus kan het neet meer an. Tachtig precèènt van de patiënten doar bint neet in e èènt. Woerumme neet? Zie wilt het neet, zie meugt het neet, zie kunt het neet. Zie zeet beeren op de weg. Het kan en mag allemoal en de groote massa moet er maar begrip veur opbrengen. Kriegt wie dinsdag weer de beparkingen? Moet de gewone zorg weer wieken veur disse groep mensen? De twiefel slöt toe. Ie zult met oen versletten huppe maar weer een half joar motten wachten. Ie zult de tumor in oen lichaam maar weer groter zeen worden. De mensen wordt onzeker. De eene helfte hef het oaver tweideling, de andere helfte zeg, èènten. Wat is tweideling as ie met oen inentingsbewies oaveral in meugt. Wat is tweideling as ie met oen testbewies oaveral terechte kunt. Het is hooguut lastig. Het advies van de grote massa is, loat oe èènt’n. Wie wilt neet meer anderhalf joar thuus opgeslötten zitten achter de geraniums. Wie wilt neet meer de angst det de kinder op schoole vriendjes met corona hebt zitten. Wie bint bange det ze het oaverbrengt noar opa en oma. De mensen in de zorg zit tut an de nekke in het wark. Zie loopt al völs te lange op de teene, um al die zeeken te helpen. Ook al kriegt wie corona der onder, dan nog zal het spitsuur blieven. Wat wie kunt doon, de èèntingen halen, zodet wie in ieder geval ons steentje hebt bie gedreagen um de zeekenhuuze te ontlasten. Wis ie trouwens, as ie in het zeekenhuus komt met corona, det ie ook vol wordt gespoten met geneesmiddelen, woervan ie niet weet, wat er allemoale in zit. As ie zo zeek bint, maakt het niks meer uut, wat ze doot. Het enige wat ie wilt is, better worden. Ie wilt noar huus en gezond weer, doar kunt wie met mekaar allemoal an met helpen.