Klik hier om de 3D animatie te bekijken
Wat möw we zôônder karmse!
Het lig à wier ne wekke achter ôôns. Een dag of wat heij’ wà nèurig um biej te kômm’n uut den roes van gezellighèid. Wat biej’ ne hôôp lèu tèèg’n ekömm’n. Van heinde en vèèr kômt ze op Battum an um fees te vier’n. Uutgezakt in de stool loaj’ alles nog is vuurbiej kômm’n.
Op de zungdagmiddag, met de kleinkinder, het geeld vlug oe uut de tässe. Èèm’n biejproat’n met de ôôle buurman uut Portugal, ie kent ‘m ja hoaste neet wier. Ne weeld vrèimd’n sprek oe an op de wekkelijkse pennevrucht’n. Gelukkig, het wördt toch nog elèèz’n. Met popp’n, olieboll’n van nen euro per stuk en àànder ééndagsplezèèr goaj’ op huus an. De geluud’n van de karmse verstarft achter oe. Gelukkig köw we lekker uutsloap’n. Moandagmänn’n, ie hooft neet meer um zèum uur. De kleinvèèmark lig à tied’n achter ôôns. Ie mist ‘t, mà ja. Wàj’ völle meer mist, is de rommel- en kroam’nmarkt. Ie hooft er ech neet um half elme te weer, het is nog uut e störm’n. Twei of drei man vuur ’t schap en dan kriej’ ’t te heur’n. De Battemse Karmse hef ’t moeilijk. Het steet op umme vall’n. Hoe is ’t mèugelijk, op de zundag en moandag köj’ der oaver de köppe lôôp’n. Het wördt oe verteld duur een man van de organisatie. Àmoa rèègeltjes, ieder joar meer en meer. De karms’nlèu en de horeca doot er à völle geeld biej, ààns kon ’t à hèèmoa neet meer. De gemeente möt biej spring’n, ààns kump de 481 ste karmse van Battem in gevoar. Det kan neet, liek en rech, de joarlijkse karms’n in de heèle gemeente verdeent dezelfde ôôndersteuning as de Deimter Karmse. Doar lig nog ne schôône taak vuur ôônze vertegenwoordigers in de Road. Zie stuurt ne brèèf oaver belèèving van kultuur. Niks kan der tipp’n an de Battemse Karmse. Èèm’n een paar biertjes met de buurjonge. Gezellig, eem’n preum’n, met de ôôle generatie, van de veleta. Buut’n op ’t plein geet ’t met hààne en beene. Het wördt tied vuur een viske. De middag vlug vuurbiej en vuur de oamd gèèf ie ’t stökske geerne oaver. Battemse Karmse, eeuwenôôlde kultuur, verstikt ’t neet in rèègeltjes mà hôôld ’t in stàànd.
