Water en neet zo wèinig

Gelukkig blif het hier biej een waterig zunneke, met of en touw ne beste bujje. Vannach drèum’n ik det het water biej ôôns noar binn’n gulp’n. Biej één van die korte felle rèèng’nbujj’n zag ie het van de weg of, de weire in lôôp’n. Ie realiseerd’n oe det as det twei daag’n vedan zôl goan, dàj’ de veute neet drèuge heuld’n. De oavergàànk van de zommer noar de harfs is in ezet. Misschien nog ééne stoeptrekking en het zommer is vuurgood vuurbiej.

Het geet àmoa roazend snel. Ie knippert ne kèèr met de ôôg’n en doar lig wier een joar achter oe. Vuurig joar um diss’n tied wörd’n wiej verbliejd met de geboorte van ne gezôônne kleindochter. Noe, een joar later löp ze à wier waggelend duur de kamer en löt ze duudelijk heur’n en zeen, det ze der mag wèèr. Ie kiekt er noa en beseft, dàj zelf ôk wier een jeuirke eulder bint. Het lèèm’nsrad drèèit onverbiddellijk vedan. Aj’ dit stukske ôônder ôôg’n kriegt, lig Prinsjesdag achter ôôns. Het zal ôôns prinsesje ne zörg wèèr. Eur wereldje is noe nog neet grötter as de wonkamer, mà hoe meer of ze ontdekt, hoe meer hobbels op de weg of ze tèèng’nkump. Boem, doar lig ze, op een hoar noa mist ze ’n hook van de toafel. Zie drèèit de knop umme, steet op en vedan geet ’t wier. In den Haag is ’t neet ààns. Het zwaai’n noar de Koning lig achter ôôns. Wiej hebt in één kèèr nen asielkrisus. Doar könt noe dinge diet vuur een tiedje trugge onmèugelijk wadd’n. Duutsland geet vuurop, doar wördt kontrolèèrt an de grèènz’n. Netuurlijk köj’ neet alles tèèng’n hôôld’n, mar alle klèine betjes helpt. Oppass’n dàj’ neet te veer goat. Ie hôôlt oen harte vaste àj’ de ontwikkeling’n zeet in Ôôst Uuropa en Gaza. Het lik nog lange neet op vrèè. Zô geet ’t ôk met de klèine dèèrne. Zie zal eur hèufd vaste nog wà ne kèèr stôôt’n an ‘n hook van de toafel. Èèm’n de brulle opzett’n en vedan. Zörg’n dàj’ ‘n gàànk der in hôôlt. Op weg noar een niej joar. Hopp’n det het good blif goan en het zôônder al te völle kleerschuur’n mag verlôôp’n. Ôôndertuss’n blif het mà rèèng’n in Pool’n en umstreek’n. Doar hôôlt ze de veute neet drèuge.