Plan De Brink
Klik hier om de 3D animatie te bekijken

Wie geet er winnen?

De eene helfte van de mensen is gangs met wielrennen, de anderen bint verslingerd an voetbal of zit op de trekkers. De Nederlandse sprinters zult nog eaven moeten wachten, want Parijs is nog veer. Veurlopig bint het de voetbaldames diet an zet bint. Één puntje is ter binnen en doar zult er nog wal wat bie kommen.

Demonstreren met trekkers is van alle dag. De concurrentie kump van alle kanten. Het zwoarste moet nog kommen. Det geldt veur iedereene. De renners trekt disse wekke de bargen in. De kaarten liekt min of meer geschud, of kump ter nog ne sluipmoordenaar die roet in het etten gooit. Onze vriend Corona geet met de botte biele deur het peloton en maakt zo maar willekuurige slachtoffers. Neet alleene in het peloton, ook de gewone man krig ter met te maken. Gelukkig kun ie oen loaten enten um den ongeneudigden gast veur te blieven. Tegen de tied det de dames uut gevoetbald bint en de hardrieders uutbloast in Parijs, kump zo gangswieze ons Westerkappeln weer an bod. En wat hebt ze ne mooie indeling. Vier ploegen uut de gemeente. Wie wordt de beste? Maar doarneust ook, as toetje, Hoolten en Markel. Olderwetse streekderbies, diet veul mensen noar het voebalveld zult trekken. Lekker toch, mooi binnendeur, op de fietse en genieten van ons mooie platteland. Inmiddels blieft de Plattelanders protesteren. Her en der zeet ie vlaggen onderste boaven an de mast hangen. De anhang greuit. Doar mot wat gebuuren. Doar mot geproat worden. Maar ja, zie bint in den Haag met reces, dus det moddert het heele zommer nog wal vedan. Kortumme, wie hebt nog genog um noar uut te kieken. Vier kansen det er ne ploeg uut de gemeente Deaventer kampioen wordt. De Plattelanders diet onder anvoering van Caroline goat veur ne grote zege bie de volgende verkiezing. Onze boeren diet eur stemme oaveral loat heuren en corona det wie buuten de deure moet holden. Met mekaar een betje polderen en wie geet er dan winnen, natuurlijk ons ABS.