Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Wind, wind en nog eens wind

Code oranje, loat wie vandaage maar bie huus blieven. Neet de weg op, zo worden der angeroaden. Het zol beesteweer worden. Alle voetbal lag ter al uut. De kinder kwamen ook al op de zundagmorgen in plaatse van ’s middags. Alles wat ook maar weg kon weejen, hadde wie vaste gezet of noar binnen gedoane. Beelden van umgeweijde beume en ofgerukte daken gingen oaver de beeldbuis.Ja, wie waren best wel een betje angstig, wetende det er niks zo onveurspelbaar is as wind en water. Laate op de middag toch nog maar eaven een rondje maken um het huus hen. Het veugelhuuske nog maar is extra vaste gezet. Het bleef redelijk rustig met hier en doar geveurlijk zwiepende beume. Buuten was het uutgestörven. Iedereene zat kennelijk te wachten op het neuiderende onheil. Bie het vallen van de duusternis nog altied gen ofbrekkende takken en vleegende pannen. Gelukkig maar. En dan tegen een uur of tiene, in één keer, een slag op de roeten en direkt nog eene. Slagreagens, heel eaven. Noe geet het beginnen, maar nee, met de vief minuten worden het al weer rustiger. Eaven buuten kieken en gelukkig, alleene wat kleine ofgerukte takken. Opgelucht zak ie trugge in de stool en denkt an de storm van veurig joar, gen landelijke code oranje, maar, links en rechts um oen hen, heel völle schade. Ie hebt de neiging um te denken det het oaverdreven is, maar kiek ie noar de berichten, dan besef ie, dat wie tut noe touw disse keer geluk hebt gehad. Nog altied booldert de wind um het huus. Wie zeukt het bedde op. Ie kunt het toch neet tegenholden. Morgen weer biester en winderig weer. Loat wie hoppen det het gauw röstiger wordt, zodat wie, zonder schade, dit verhaal tot ons könt nemmen. Het weer en het leaven blieft onvuurspelbaar. De eene keer geet het oe vuur de wind en de andere keer krieg ie de wind van vuuren. Wie zit gen één van allen te wachten op de volle loage.