Zie bint er maar drok met

Ofgeloopen wekke zag ie de jongens en meiden drok in de weer met het ophalen van al die spullen veur de boeldag. Het is machtig mooi um te zeen det die jonge gasten doar ieder joar weer tied in wilt stekken um, met de opbrengst van al det gezwoeg, verenigingen en instellingen in ons darp, een extra ondersteuning te geven.

Doarumme alleen al is het een goeie zaak um oen spullekes met te geven an disse jeugd. Zie bekiekt het allemoale heel sekuur en de zaken diet meer dan gemiddeld mooi bint, hebt grote kans um in de veiling terechte te kommen. Ankommenden zoaterdag is het zo veer. Met mekaar noar de boeldag, gezellig rondneuzend tussen al die mooie dinge en netuurlijk niet met leuge handen noar huus hen. Zoaterdagmorgen, de grote run noar de manege. Indrukwekkend as ie ieder joar weer ziet hoevölle auto’s der op de weide bie de olde mölle geparkeerd stoat. Eaven in de file bie de ingang en dan kieken of ter nog iets is van oen gading. ’S middags met mekaar op de hoolten banken en met bieden op al die spannende kavels. Wie geet er strieken met het golden koopje, woar al zo lange noar is uutgekekken. Wie krig ter iets an de bokse woar de geheele veiling um moet lachen? Wie geet er strieken met het schilderietje met det mooie zeegezicht? Ie wilt het neet missen. Wie goat het allemoale zeen. Al met al geet het um de gezelligheid en natuurlijk de uuteindelijke opbrengst. Ie kiekt er noar uut, de loch van de manege wordt oaver genomen deur de geur van die onmeunige lekkere oliebollen. Iedereene is good te passe. De heele dag gezelligheid, zelfs bie het scheiden van de markt. De eene wekke lever ie oene prullaria in, um de andere wekke met nieje spullekes bie huus te kommen. De harfs is in het land. Iedereene zoch warmte en de gezelligheid en doarumme, met zien allen op noar de boeldag, dan bint ze der in ieder geval neet veur niks drok met gewest.