Zie kômt er àmoa wier an

Ie zölt oe ofvroag’n, wie en wat verwach ie dan amoa? Nôh ja, àj’ good ôp de tillevisie hebt ekekk’n, dan wèèj’ ’t. Alle oamde kriej’ neuis de reklame, tut vervelends touw, de gesprekk’n van de keerls en vroole uut de politiek. Zie hebt àmoa geliek, mà geneene gif rèègelrechte antwoord’n. Zie drèèjt um de vroag’n hen.

Het lik wà of ze bange bint um zeteltjes te verleez’n. Gelukkig, nog ne goeie wekke, dan meug e wiej in het stemhukske loat’n wèèt’n, waw we der uuteindelijk van vindt. Wiej könt oaver tut de orde van de dag en àllèène mà hopp’n daw we in ’t vuurjoar ne nieje regering hebt en alles better wördt. Wat kump ter dan nog meer an? Ie hebt vaste wal emarkt det de winkels inmiddels vol ligt met peppernött’n en ààndere zeutighèid. De daag’n wordt körter en körter, nog een paar wekke en december is in ’t làànd. De carnavalist’n hebt de steek al wier op en de Battemse Prins en zien gevolg bint à wier singalèèrt in meerdere feestzaal’n. Nog èèm’n en Sunterkloas kump, met ziene Piet’n, anvaar’n oaver de Schipbekke. De kleintjes kiekt dan alle daag’n in ’n klôômp of ter nog ne klèinigheid vuur eur is ebrach. Môôie tied’n, päkskesoamd, loaw we ’t in eere hôôld’n. De stroatversiering is à hèèmoa in Karssfeer’n. In sommige winkels verzoep ie à in de warmte van de Karsdaag’n. Zô gauw as Sunterkloas ziene hakk’n hef loat’n zeen, is ’t buut’n één’n grôôt’n Karsbôôm. Geniet er van, want vuur dàj’ der arg in hebt bint die daag’n, woerin een mèènse tut röste kump, vuurbiej en wordt ie wakker van het gescheet van Ôôld op Niej. Ie zit op de kökk’n en oaverdèènkt het joar. Wat is ter àmoa an geluk ewes, wat is neet meer en zal ôk nôôit meer hetzelfde weer. De duustere daag’n vuur de Karsdaag’n. Ôôndertuss’n valt oaverà in de wereld de bomm’n daale. Woenneer zal det ôôit is een kèèr stopp’n? Gelukkig, verkiezing’n, Sunterkloas, de Karsdaag’n, Ôôld en Niej en de Carnaval, het kump ter àmoa nog an. Loaw we der van geniet’n