Zweven

De ofgeloopen daage was het echt zweven. Was het neet deur het carnaval, dan wal um de striemende reagen met keiharde wind. Echt weer um lekker bie de kachel te blieven. Maar veur de carnavalsvierders een weekend um weer völle olde bekenden tegen te kommen. Veur disse carnavallisten was het best spannend. Zollen de optochten wal deur goan? Daags van te veuren was het in Eindhoven al of ebloazen.Gelukkig kon het in Holten deur goan. Zo trokken wie op de zoaterdag noar het Keunedarp um te bekieken, hoe mooi of een carnavalsstoet kan weazen. Doar stun ne straffe kolde wind, maar het bleef dreuge. Met een extra truitje en ne lange onderbokse an, doot ie wonderen. Duuzenden mensen hebt genoten van die mooie praalwagens diet an hun ogen veurbie trökken. Doar deed zelfs een wagen met uut het Deaventerse Colmschoate. Met weemoed dach ik trugge an de optochten diet ooit op de zundag deur het olde Stokvissengat trökken. Maar ja, vermoedelijk had ôôk die optocht neet deur kunnen goan, vanwege het bar slechte weer, de storm en onverwachte windvlagen. De optochten, altied een heugtepunt veur völle carnavalsvierders uut de regio. Moandenlang soms, bint ze bezig met het optuugen van al die praalwagens. Groot is dan de teleurstelling, det al det wark veur niks is ewes. Groot respekt veur al die wagenbouwers, diet hun creatie in de loodsen mossen loaten stoan. Gelukkig ging het carnaval binnen gewoon deur, zodet het her en der bes gezellig was. Op zoaterdag zag ie onze Battemse Pompers genieten van het feest in het carnavalsgekke Holten. Zelfs laat op de avond leup ter nog ééne in de polonaise. Zie waren gewoon vergetten hem mee trugge nemmen. Veur- en tegenslagen, zie zweeft met de dagen met, van senioren noar kindercarnaval. De kammeroadschap is groot en noar vier daage, van iedereene gelieke, gen rangen en standen, komt ze hoppelijk, noar die lange zweefpartij, met ne zachte landing weer op de begane grond. Dan begint veur sommigen het vasten en veur anderen het oftellen noar het volgende carnaval.